Aslan Kərimov: Premyer Liqada 10 komandadansa, 12 klubun olması daha məntiqlidir
Bakı, 13 may, AZƏRTAC
“Azərbaycan çempionatında istənilən halda komanda sayının çox olması futbolumuzun inkişafı üçün əhəmiyyətlidir”.
Bu sözləri AZƏRTAC-a açıqlamasında Azərbaycanın veteran futbolçusu Aslan Kərimov AFFA İcraiyyə Komitəsinin bugünkü iclasında Premyer Liqada komanda sayının artırılması ilə bağlı müzakirə olunacaq məsələ barədə danışarkən deyib.
52 yaşlı mütəxəssis bildirib ki, yüksək liqada 10 komandadansa, 12 klubun olması daha məntiqlidir: “Lakin burada infrastruktur da mühüm rol oynayır. Məsələyə hərtərəfli yanaşmaq lazımdır. Təbii ki, sayın çoxaldılması yaxşı haldır. Amma çempionatımızın buna hazır olub-olmadığını nəzərə almalıyıq. Komandalarımızın sayını çoxaldıb az büdcə ayırmağın futbolun inkişafına heç bir xeyri olmayacaq. Lakin kifayət qədər büdcə ayrılarsa, hər şey qaydasına düşəcək”.
Qeyd edək ki, hazırda Azərbaycan Premyer Liqasında 10 komanda mübarizə aparır.
Bölmənin digər xəbərləri
