AŞPA SƏDRİNİN MÜAVİNİ VƏ BÜRO ÜZVÜ İLHAM ƏLİYEVİN MÜSAHİBƏSİ
Avropa Şurası Parlament Assambleyası sədrinin müavini və Büro üzvü İlham Əliyev Rusiya Dövlət dumasının Beynəlxalq məsələlər komitəsinin sədri Dmitri Roqozinlə apardığı danışıqlar, habelə Bakı-Tbilisi-Ceyhan əsas ixrac neft kəməri və Bakı-Tbilisi-Ərzurum qaz kəməri ilə əlaqədar kütləvi informasiya vasitələrinin nümayəndələrinə müsahibə vermişdir.
SUAL: İlham müəllim, siz Rusiyada yaşayan azərbaycanlılarla bağlı hər hansı bir məsələ müzakirə etdinizmi?
İLHAM ƏLİYEV: Bəli, müzakirə etdik. Mən, öz fikrimi bildirdim. Çox şadam ki, cənab Roqozin də bu barədə çox düzgün mövqedədir. Bilirsiniz ki, Rusiyada qeyri-leqal yaşayan xarici vətəndaşlar haqqında müəyyən qanunvericilik aktları qəbul olunubdur. Əlbəttə, biz çox narahatıq ki, bu məhdudiyyətlər orada yaşayan azərbaycanlılara da tətbiq oluna bilər. Bu barədə çox yaxşı söhbətlərimiz oldu. Biz qərara gəldik ki, bu məsələ barəsində müvafiq orqanlarla daim danışıqlar aparılacaq, əlaqə yaradılacaq ki, qüvvəyə minmiş yeni qanunlar bizim azərbaycanlılara çox da təsir etməsin.
SUAL: İlham müəllim, cənab Roqozin bildirmişdir ki, yeni miqrasiya qanunu ilə bağlı ikitərəfli saziş hazırlana bilər.
İlHAM ƏLİYEV: Yəqin ki, saziş onunla bağlıdır. Amma mən də dedim ki, hər iki ölkənin müvafiq orqanları bu barədə gərək ətraflı fikirləşsinlər, əməkdaşlıq etsinlər.
SUAL: İnformasiya agentlikləri belə bir məlumat yaymışlar ki, Azərbaycan, Gürcüstan və Türkiyə prezidentləri Bakı-Tbilisi-Ərzurum qaz kəmərinin təməlinin qoyulması barədə məsələ müzakirə edəcəklər.
İLHAM ƏLİYEV: Mən hesab edirəm ki, bu barədə hər şey proqram üzrə gedir və yaxın gələcəkdə Bakı-Ərzurum qaz kəməri haqqında sanksiya veriləcəkdir. Maliyyə məsələlərinin, demək olar, əksəriyyəti öz həllini tapıbdır. Azərbaycan dövləti bu layihəyə vəsait ayıracaqdır. Eyni zamanda, Avropa Bankı ilə də danışıqlar davam edir. Bilirsiniz ki, biz Avropa Bankına mandat məktubunu göndərdik. Onun əsasında kreditlər verilməlidir. Bir sözlə, əminəm ki, Bakı-Ərzurum qaz kəmərinin tikintisində heç bir problem olmayacaqdır.
SUAL: İlham müəllim, kəmərin tikintisinin maliyyələşdirilməsi barədə ilkin qərar verilibdir. Vəsaitin ayrılması üçün hansısa ciddi şərtlər qoyulubmu?
İLHAM ƏLİYEV: Yox, ciddi şərtlər yoxdur. Başlıca şərt odur ki, maliyyə məsələləri həll olunsun. Biz ümidvarıq ki, Avropa Bankından nəzərdə tutulan kredit tezliklə veriləcəkdir. O vaxta qədər Azərbaycan öz payını ayırmağı təmin edəcəkdir.
SUAL: Bakı-Ceyhan neft kəməri ilə bağlı Dünya Bankının maliyyə qurumları kredit verməli idilər. Onlar deyirlər ki, qeyri-hökumət təşkilatları ilə bağlı məsələ tam həll olunmadığına görə problemlər yarana bilər. Bildirilmişdir ki, Beynəlxalq Valyuta Fondu ilə olan anlaşılmazlıq kreditin ayrılmasına öz təsirini göstərə bilər. Belə təsir varmı?
İLHAM ƏLİYEV: Mən çox təəssüf edirəm ki, belə meyllər vardır. Bilirsiniz ki, bir neçə ildir Azərbaycan ilə Beynəlxalq Valyuta Fondu arasında çox uğurlu əməkdaşlıq olubdur. Amma son zamanlar onların qeyri-müəyyən təklifləri bizdə birmənalı qarşılanmır. Yəni Azərbaycan hər bir təklifi qəbul edəndə, əlbəttə, ilk növbədə gərək öz milli maraqlarını müdafiə etsin. Valyuta Fondunun bəzi tövsiyələri bizim milli maraqlarımıza uyğun gəlmir. Ona görə də biz bunları qəbul etmirik. Çox təəssüf edirəm ki, biz də belə meylləri duyuruq ki, Bakı-Ceyhan kəməri üçün nəzərdə tutulmuş kredit məsələsi də sanki Valyuta Fondunun bizə olan münasibətinə bağlanır. Hesab edirik ki, bunlar tamamilə ayrı-ayrı məsələlərdir. Azərbaycan ilə Valyuta Fondu arasında olan məsələlər ayrı prizmadan həll edilməlidir. Bakı-Ceyhan kəmərinə gəldikdə isə, bu müstəqil layihədir. Nəinki biz, Valyuta Fondunun əsas donorları olan başqa dövlətlər də ilk növbədə Bakı-Ceyhan layihəsində maraqlıdırlar. Ona görə biz hesab edirik ki, kreditlərin ayrılmasında ləngimələr, əlbəttə ki, yaxşı hal deyildir. Biz, bu barədə bp şirkəti ilə artıq danışıqlar aparırıq. Bilirsiniz ki, Azərbaycan kəmərin tikintisinə çəkiləcək xərclərin 30 faizini ödəməlidir və ödəyir. Qalan 70 faizin tapılmasında ləngimələr olacaqsa, deməli biz bunu bp ilə birlikdə həll edəcəyik.
Bölmənin digər xəbərləri
