QAN YADDAŞI
Aşqabadda Xocalı faciəsi qurbanlarının xatirəsi yad olunub
AŞQABAD, 24 fevral, АZƏRTAC
Azərbaycanın Türkmənistandakı səfirliyində Xocalı soyqırımının 25-ci ildönümü ilə bağlı tədbir keçirilib.
Tədbirdə səfirliyin əməkdaşları, Türkmənistanda yaşayan həmvətənlərimiz və ictimaiyyət nümayəndələri iştirak ediblər.
Əvvəlcə soyqırımı qurbanlarının xatirəsi birdəqiqəlik sükutla anılıb.
Tədbiri giriş sözü ilə açan səfir Həsən Zeynalov bu il Xocalı soyqırımının 25-ci ildönümünün qeyd edildiyini bildirib. Diqqətə çatdırıb ki, 1992-ci il fevralın 25-dən 26-na keçən gecə Ermənistan silahlı qüvvələri keçmiş sovet ordusunun 366-cı motoatıcı alayının köməyi ilə Xocalı üzərinə ağır hərbi texnika yeridib, yerlə-yeksan etdikləri şəhərin dinc əhalisinə misli görünməmiş qəddarlıqla divan tutublar. Qeyd edilib ki, sadəcə azərbaycanlı olduqları üçün Xocalının mülki əhalisi məqsədli şəkildə qırğına məruz qalıb. Soyqırımı nəticəsində 106-sı qadın, 63-ü uşaq və 70-i yaşlı olmaqla, 613 mülki şəxs qətlə yetirilib, 1000-dən çox sakin yaralanıb, 1275 insan əsir götürülüb, 197 sakin itkin düşüb.
Ermənistan silahlı qüvvələri tərəfindən dinc sakinlərin kütləvi şəkildə öldürülməsinin, dərilərinin soyulmasının, başlarının kəsilməsinin, hamilə qadınların süngülərə keçirilməsinin və cansız bədənlərinin eybəcər hala salınmasının dünya üçün sirr olmadığını deyən səfir H.Zeynalov bunun Ermənistanın o dövrdəki müdafiə naziri və hazırkı prezidenti Serj Sarkisyan tərəfindən də etiraf edildiyini bildirib.
Diplomat Xocalıda törədilən vəhşiliklərin təsadüfi olmadığını, bunun Ermənistanın sistemli şəkildə həyata keçirdiyi mənfur və amansız etnik təmizləmə siyasətinin tərkib hissəsi olduğunu vurğulayıb. Xocalıda törədilənlər beynəlxalq cinayətdir. Bu əməlləri törədənlər, onlarla əlbir olan və onlara kömək edən hər bir kəs məsuliyyət daşıyır.
“Xocalıya ədalət!” kampaniyası çərçivəsində atılan addımların əhəmiyyətini qeyd edən səfir deyib: “Beynəlxalq hüquq çərçivəsində görülən davamlı tədbirlər cəzasızlığa son qoyulmasına və Ermənistanın Azərbaycana qarşı təcavüzü fonunda törədilmiş ağır cinayətlərə görə məsuliyyət daşıyan şəxslərin ədalət məhkəməsinə gətirilməsinə xidmət edəcək”.
Daha sonra səfirliyin müşaviri tərəfindən Azərbaycan Respublikası Xarici İşlər Nazirliyinin Xocalı soyqırımının 25-ci ildönümü ilə bağlı bəyanatı səsləndirilib.
Tədbirdə mülki əhaliyə, uşaqlara, qadınlara və qocalara qarşı onların milli mənsubiyyətinə görə edilən bu hərəkətlərin heç bir bəraətinin olmadığı qeyd edilib, bu soyqırımı törədənlərin ədalət qarşısında cavab vermələrinin vacibliyi vurğulanıb.
Çıxışlardan sonra tədbir iştirakçıları Xocalı soyqırımını əks etdirən fotosərgi ilə tanış olublar. Sonra sənədli film nümayiş etdirilib.
Tədbir iştirakçılarına Xocalı faciəsi ilə bağlı bukletlər paylanılıb.
İlahə Əhmədova
AZƏRTAC-ın xüsusi müxbiri
Aşqabad