Auditorlar Palatasında dayanıqlı inkişafa dair bacarıqların artırılması üzrə beynəlxalq vebinar keçirilib
Bakı, 29 oktyabr, AZƏRTAC
Azərbaycan Respublikasının Auditorlar Palatası ilə İmtiyazlı Sertifikatlaşdırılmış Mühasiblər Assosiasiyası (ACCA) arasında mövcud olan Anlaşma Memorandumuna uyğun olaraq, auditorların dayanıqlı inkişafa dair hesabatlılıq sahəsində bilik və bacarıqlarının artırılması məqsədilə “Maliyyə mütəxəssislərinin dayanıqlı inkişafa dair hesabatlılıq üzrə bacarıqlara yiyələnməsi vasitəsilə imkanlarının genişləndirilməsi” mövzusunda birgə maarifləndirici vebinar təşkil edilib.
Auditorlar Palatasından AZƏRTAC-a bildirilib ki, tədbirdə Auditorlar Palatasının əməkdaşları, sərbəst auditorlar, auditor təşkilatlarının rəhbərləri, onların assistentləri və mütəxəssisləri iştirak ediblər.
Vebinarın əsas məqsədi maliyyə, audit və mühasibat uçotu sahəsində çalışan peşəkarların dayanıqlı inkişafa dair bilik və bacarıqlarını inkişaf etdirmək, eləcə də Avropa Davamlılıq Hesabatlılığı Standartlarının (ESRS), Beynəlxalq Maliyyə Hesabatı Standartları Şurasının (IFRS/ISSB) qəbul etdiyi S1 “Dayanıqlı inkişafla bağlı məlumatların açıqlanmasına dair ümumi tələblər” və S2 “İqlimlə bağlı məlumatların açıqlanması” standartlarının, həmçinin “Beynəlxalq dayanıqlılıq hesabatlarının təminatı üzrə ISSA 5000”in tətbiqi kontekstində mühasiblərin və auditorların dəyişən rolunu müzakirə etməkdən ibarət olub.
Vebinarı giriş sözü ilə açan Auditorlar Palatasının Beynəlxalq əlaqələr və xarici təşkilatlarla iş üzrə komitəsinin sədri Fəqan Qarayev müəssisələrin dayanıqlılıq risklərinin maliyyə nəticələrinə təsirindən, yeni Dayanıqlı Hesabatlılıq Standartlarının biznes qərarlarına inteqrasiyasından, auditorların dayanıqlı inkişafla bağlı məlumatların təminatında artan məsuliyyəti və rolundan, ACCA-nın Dayanıqlı İnkişafa dair Hesabatlılıq və Təminat üzrə təlimlərinin Auditorlar Palatası tərəfindən tədrisindən, auditorların bu sahə üzrə beynəlxalq sertifikatlara və diplomlara yiyələnməsinin vacibliyindən danışıb. F.Qarayev, həmçinin diqqətə çatdırıb ki, Azərbaycan Respublikasının Auditorlar Palatası ilə ACCA arasında əməkdaşlıq çərçivəsində belə tədbirlərin təşkili auditorların və maliyyə mütəxəssislərinin beynəlxalq standartlara uyğun peşəkar hazırlığının təmin edilməsinə xidmət edir.
Daha sonra ACCA-nın Avrasiya regionu üzrə ictimaiyyətlə əlaqələr departamentinin rəhbəri Gaukhar Aşirbekova tərəfindən təqdimat dinlənilib. O, dayanıqlı inkişafa dair bilik və bacarıqların müasir maliyyə mütəxəssisləri üçün zəruri olduğunu vurğulayaraq qeyd edib ki, mühasibat və audit peşəsinin əhatə dairəsi getdikcə genişlənir və dayanıqlı biznes modellərinin qurulması, hesabatlılıq və təminat üzrə bilikləri də özündə birləşdirməlidir.
Tədbir iştirakçıları dayanıqlı inkişafla bağlı hesabatlılığın milli səviyyədə tətbiqi, beynəlxalq standartlara uyğun məlumatların açıqlanması və bu prosesdə auditorların rolu barədə fikir mübadiləsi aparıblar.
Vebinarda dayanıqlı inkişafa dair hesabatlılıqla yanaşı, növbəti mərhələlərdə ACCA ilə birgə audit və digər əlaqəli xidmətlərin göstərilməsinə dair beynəlxalq sertifikasiya proqramının həyata keçirilməsi də məqsədə müvafiq hesab edilib.
Bölmənin digər xəbərləri
