DÜNYA
AVRASİYA İQTİSADİ BİRLİYİNİN İCLASI KEÇİRİLMİŞDİR
Almatıda Belarus, Qazaxıstan, Qırğızıstan, Rusiya və Tacikistanın daxil olduqları Avrasiya İqtisadi Birliyinin 13-cü iclası başa çatmışdır. Moldova, Ukrayna və Ermənistan nümayəndələri iclasda müşahidəçi statusu ilə iştirak etmişlər.
Birliyin baş katibi Qriqori Panoma öz çıxışında bildirmişdir ki, birlik çərçivəsində ümumi gömrük tariflərinin formalaşdırılması və nəqliyyat ittifaqının yaradılması bir az çətinlik törədir. Ümumiyyətlə isə, üzərimizə götürdüyümüz öhdəlikləri yerinə yetiririk.
24 məsələnin müzakirə edildiyi iclasın yekunları ilə bağlı keçirilən mətbuat konfransında Rusiya hökuməti sədrinin müavini Viktor Xristenko demişdir ki, yaxın zamanda ikili təyinatlı məhsullar üzərində ixrac nəzarətinin vahid qaydası, qiymətli kağızlar bazarında əməkdaşlıq və MDB vətəndaşlarının müvəqqəti miqrasiyası haqqında sazişlərin layihəsi Avrasiya İqtisadi Birliyinin üzvü olan dövlətlərin başçıları tərəfindən imzalanacaqdır.