AVROPA BİRLİYİ QANUNSUZ SƏYAHƏTLƏRİN QARŞISINA SƏDD ÇƏKMƏK NİYYƏTİNDƏDİR
Avropa Birliyinin Beynəlxalq Polis Təşkilatı Birlik ölkələrinə qanunsuz səyahət edənləri müəyyənləşdirmək məqsədi ilə sərhəd keçid məntəqələrində yoxlamalar aparmışdır. Almaniya, Avstriya və İtaliya sərhədlərində iki həftə ərzində minlərlə avtobus, Mərkəzi və Şərqi Avropa ölkələrindən gələn 11552 minik avtomobili və 16 000 sərnişin yoxlamadan keçirilmişdir. Yoxlananların 416-sı şübhəli şəxs kimi qeydə alınaraq geri qaytarılmış, 308 nəfəri isə beynəlxalq səviyyəli cinayətkar kimi həbs edilmişdir. AFR-in daxili işlər naziri Otto Şili mətbuata verdiyi açıqlamada bildirmişdir ki, “Semper Virgilia” (“Həmişə sayıq olmalı”) kodu ilə keçirilən yoxlama əməliyyatında Fransa, İtaliya, Avstriya, Portuqaliya, İspaniya, Rumıniya və Almaniya sərhəd mühafizəçiləri iştirak etmişlər. Məlum olmuşdur ki, Avropa ərazisi ilə hərəkət edən avtobuslar yalnız qanunsuz səyahət edənləri daşımaqla məşğuldur. “Avropa Birliyi bu təhlükəli vəziyyətə biganə qala bilməz”. Nazir bütün Birlik məkanında bu əməllərə qarşı yekdil və qəti mübarizə aparmağın və Ümumavropa beynəlxalq sərhəd polisinin təxirəsalınmadan yaradılmasının vacibliyini vurğulamışdır.
Bölmənin digər xəbərləri
