Bakı, 19 yanvar, Hikmət Əhmədov, AZƏRTAC

Qərbin keçmiş Ermənistan-Azərbaycan münaqişəsi ilə bağlı nümayiş etdirdiyi mövqe ikili standartlara ən bariz nümunədir. Azərbaycan torpaqlarını zəbt edən Ermənistana qarşı 30 ilə yaxın heç bir təzyiq göstərilmədi, işğalçı cəzalandırılmadı, ölkəmizin ərazi bütövlüyünün toxunulmazlığı ilə bağlı BMT-nin qəbul etdiyi 4 qətnamənin həllinə etinasızlıq göstərilirdi. Ötən dövr ərzində işğalçı Ermənistan Qərb “demokrat”larından hər cür maddi yardım aldı, təcavüzkarla işğala məruz qalanın adı eyniləşdirilirdi. İşğalçılıq siyasətini pisləyən qətnamələri qəbul edən BMT-də təcavüzkar ölkə Ermənistan Azərbaycanla birgə təmsil olunursa bu açıq-aşkar separatçılığa dəstək deməkdir. Haqlı ilə haqsıza eyni yanaşma ikili standartların mahiyyətini tam ifşa edir.

AZƏRTAC xəbər verir ki, indi isə bu qərəzli yanaşmanı Avropa Parlamentinin yanvarın 18-də qəbul olunmuş qətnaməsində müşahidə edirik. Belə ki, sənəddə reallıqlardan tamam uzaq, böhtan mahiyyətli bir sıra anti-Azərbaycan xarakterli bəndlər yer alıb. Qətnamədə Azərbaycanın guya Ermənistana hərbi təcavüz etməsi, Laçın yolunun “blokada”da olması kimi sərsəm iddialarla yanaşı, artıq tarixin zibilliyində itib-batmış “Madrid prinsipləri”nə istinadlar edilib.

Halbuki, Azərbaycan ərazilərində faydalı qazıntı yataqlarının qanunsuz istismarının dayandırılmasını, “Qızılbulaq” və “Dəmirli” yataqlarında monitorinqin keçirilməsinə icazə verilməsini tələb edən azərbaycanlı könüllü gənclər və ekoloqlar tərəfindən Laçın-Xankəndi yolunun Şuşa ərazisindən keçən hissəsində təşkil olunan və heç bir siyasi xarakter daşımayan etiraz aksiyası humanitar məqsədlərə xidmət edir. Belə ki, bu aksiya ərazisindən hərəkətin sərbəstliyi mütəmadi olaraq təmin edilir. Ermənistan mətbuatında yayılan və etirazçıların guya Laçın-Xankəndi yolunu bağladıqları və təminat avtomobillərini buraxmadıqları ilə bağlı xəbərlər qarşı tərəfin növbəti dezinformasiyasıdır.

Ötən ay Yunanıstandan olan vitse-prezidenti Eva Kailinin adının milyonlarla dollarlıq korrupsiya skandalları ilə gündəmə gələn Avropa Parlamenti irqçi, islamofob, Azərbaycanofob, türkofob mövqeyi və ikili standartları ilə tanınır. Ona görə də, korrupsiya skandalları girdabında boğulan, Ermənistanın və erməni lobbisinin “konyak diplomatiyası”ndan gen-bol faydalanan Avropa Parlamentinin Azərbaycana “öyüd-nəsihət” verməyə mənəvi haqqı yoxdur. Ümumiyyətlə, bu təşkilatın daim sərgilədiyi ermənipərəst mövqe hər kəsə məlumdur. Avropa Parlamenti haqqında artıq belə bir qəti rəy formalaşıb ki, o islamofobiya xəstəliyinə yoluxmuş və insan hüquqları məsələsini əsassız şəkildə bəhanə edərək müsəlman ölkələrinə qarşı kampaniya aparmaq missiyasını yerinə yetirməklə məşğuldur. XXI əsrdə Avropanın mərkəzində deputatların Ermənistan-Azərbaycan münasibətlərinə sırf xristian həmrəyliyi prizmasından baxması biabırçı haldır.

Nə üçün Ermənistanın ərazi bütövlüyündən danışan Avropa Parlamentinin Azərbaycanın ərazi bütövlüyü yadına düşmür? Əslində bu, neçə illərdir ölkəmizə qarşı yürüdülən ikili standartlar tendensiyasının davamıdır.

Azərbaycan torpaqlarının Ermənistan tərəfindən işğal altında saxlanıldığı, yüz minlərlə azərbaycanlının etnik təmizləməyə məruz qaldığı, Azərbaycanın şəhər və kəndlərinin sistematik şəkildə yer üzündən silindiyi və sərvətlərinin talan edildiyi 30 il ərzində Avropa Parlamenti yalnız bir-iki qətnaməsinə eyni ifadələr daxil etməklə kifayətlənmişdi.

2020-ci ildə Vətən müharibəsindən sonra Azərbaycanın üzləşdiyi mina terroru nəticəsində 300-ə qədər Azərbaycan vətəndaşının partlayışların qurbanına çevrilməsi, 2020-ci il 10 noyabr tarixli üçtərəfli Bəyanatın şərtlərinə zidd olaraq Ermənistan qoşunlarının Azərbaycan ərazilərindən tam şəkildə çıxarılmaması, eləcə də Azərbaycanın qərb rayonları ilə Naxçıvanı birləşdirəcək yolun hələ də açılmaması Avropa Parlamentinin yadına düşmür? Azərbaycanı “qoşunlarını Ermənistan ərazisindən çıxarmağa” çağıran Avropa Parlamenti niyə Ermənistanı öz ordusunu Azərbaycanın hələ də işğal altında saxladığı 8 kənddindən geri çəkilməyə çağırmır? Heç Ermənistanın özü artıq ölü “Madrid prinsipləri”nə istinad etmir. Bəs Avropa Parlamentinin “Madrid prinsipləri”nə istinad etməkdə məqsədi nədir?

Ermənistanın Praqa və Soçidə Azərbaycanın ərazi bütövlüyünü və suverenliyini tanımasından sonra Avropa Parlamentinin belə mövqeyi sülhə zərbə vurur, Ermənistanda revanşistləri ruhlandırır. Bu mənada Avropa Parlamenti ilana zəhər verən kərtənkələ rolunu oynayır. Bu qurum regionda müsbət proseslərin, sülhün deyil, problemlərin tərkib hissəsidir. Avropa Parlamenti belə yanaşma ilə separatçılığı, qanunsuzluğu, ksenofobiyanı təşviq edir.

Avropa Parlamentinin ölkəmizlə bağlı qəbul etdiyi bu qərəzli qətnaməni Azərbaycan kimi müstəqil siyasət yürüdən bir ölkəyə təzyiq vasitəsi də adlandırmaq olar. Onun bu qətnaməsi boş bir kağız parçasıdır. Belə qətnamələr, qarayaxma kampaniyaları heç bir vəchlə Azərbaycanın iradəsinə təsir edə, ölkəmizin qanuni hədəflərinə çatmasına mane ola bilməz. Avropa Parlamenti unudur ki, onun üzvü olan ölkələrin bir çoxunun enerji təminatçısı məhz Azərbaycandır və bu ölkə qlobal enerji layihələrinin müəllifi kimi regionda əsas söz sahibidir. Xatırladaq ki, vaxtilə Avropa Parlamenti Cənub Qaz Dəhlizi layihəsinə qarşı çıxmışdı. Lakin zaman Cənub Qaz Dəhlizinin Avropanın enerji təhlükəsizliyi üçün vacibliyini sübut etdi.

Bu mənada, əminliklə söyləmək olar ki, Avropa Parlamenti öz oturduğu budağı kəsməklə məşğuldur. Belə ki, hazırda Azərbaycan Respublikasının Prezidentinin Davos Forumunda iştirak etdiyi, uğurlu görüşlər keçirdiyi və bunun hətta Ermənistan mediasında belə etiraf edildiyi bir vaxtda Avropa Parlamentinin Azərbaycanı əsassız yerə hədəf alan bəndlərin olduğu bir qətnaməni qəbul etməsi Azərbaycan ilə Avropa İttifaqı arasında əlaqələri korlamağa hesablanıb.

Azərbaycanofob, islamofob Avropa Parlamentinin anti-Azərbaycan mövqeyinə rəğmən, keçən il iyulun 18-də Avropa Komissiyasının Prezidenti Ursula Fon der Lyayenin Bakıya səfəri zamanı Azərbaycan ilə Avropa İttifaqı arasında enerji sahəsində əməkdaşlığa dair anlaşma memorandumunun, eləcə də dekabrın 17-də Buxarestdə Azərbaycan, Gürcüstan, Rumıniya və Macarıstan arasında yaşıl enerji sahəsində strateji tərəfdaşlıq haqqında anlaşmanın imzalanması fonunda Azərbaycan və Avropa İttifaqı arasında qarşılıqlı faydalı əməkdaşlıq davam edəcək.