Bu gün artıq Zəngəzur dəhlizi regional layihə statusunu çoxdan geridə qoyub - ŞƏRH
Bakı, 4 iyun, AZƏRTAC
Avqustun 8-də Vaşinqtonda, Ağ Evdə imzalanan sənəd Cənubi Qafqazda davamlı sülhün möhkəmləndirilməsi, regional əməkdaşlığın genişləndirilməsi və nəqliyyat-kommunikasiya əlaqələrinin inkişafı baxımından mühüm siyasi hadisə kimi qiymətləndirilir. Sənəd, eyni zamanda, uzun illərdir beynəlxalq gündəmdə müzakirə olunan Zəngəzur dəhlizinin reallaşdırılması perspektivlərini daha da aktuallaşdıraraq layihənin qlobal əhəmiyyətini ön plana çıxarır.
Bunu AZƏRTAC-a açıqlamasında “Ortaq Dəyərlər” İctimai Birliyinin sədri Aqil Camal bildirib.
Onun sözlərinə görə, Azərbaycan 44 günlük Vətən müharibəsindən sonra regionda yeni reallıqlar formalaşdırıb və bu reallıqların əsas istiqamətlərindən biri nəqliyyat-kommunikasiya xətlərinin açılması, iqtisadi inteqrasiyanın dərinləşdirilməsi və əməkdaşlıq mühitinin yaradılmasıdır.
“Zəngəzur dəhlizi bu siyasətin ən mühüm komponentlərindən biri hesab olunur. Azərbaycanın təşəbbüsü ilə irəli sürülən Zəngəzur dəhlizi layihəsi ilk gündən yalnız ölkəmizin milli maraqlarına xidmət edən təşəbbüs kimi deyil, bütövlükdə region dövlətlərinin iqtisadi inkişafına töhfə verə biləcək beynəlxalq nəqliyyat marşrutu kimi təqdim olunub. Bu gün dünyanın aparıcı siyasi və iqtisadi mərkəzlərinin layihəyə göstərdiyi maraq da bunun təsdiqidir. Son illər qlobal ticarət marşrutlarında müşahidə olunan dəyişikliklər, yeni logistika zəncirlərinin formalaşması və yükdaşımaların alternativ istiqamətlər üzrə şaxələndirilməsi Orta Dəhlizin strateji əhəmiyyətini əhəmiyyətli dərəcədə artırıb. Bu baxımdan Zəngəzur dəhlizi Şərq-Qərb nəqliyyat dəhlizinin yeni qolu kimi Avropa ilə Asiya arasında əlaqələrin daha da sürətlənməsinə xidmət edəcək. Azərbaycan artıq Şərqlə Qərb arasında etibarlı körpü rolunu oynayır. Bakı-Tbilisi-Qars dəmir yolu, Bakı Beynəlxalq Dəniz Ticarət Limanı, müasir avtomobil yolları və logistika infrastrukturu ölkəmizi Avrasiyanın mühüm nəqliyyat qovşaqlarından birinə çevirib. Zəngəzur dəhlizinin istifadəyə verilməsi isə bu potensialı daha da artıracaq və Azərbaycanın tranzit imkanlarını yeni mərhələyə yüksəldəcək”, – deyə o bildirib.
Aqil Camalın fikrincə, layihənin əhəmiyyəti yalnız iqtisadi və logistika imkanları ilə məhdudlaşmır. Dəhlizin açılması regionda siyasi sabitliyin möhkəmlənməsinə, qarşılıqlı etimadın güclənməsinə və dövlətlər arasında əməkdaşlıq platformalarının genişlənməsinə də mühüm töhfə verəcək: “Tarix göstərir ki, iqtisadi əməkdaşlıq siyasi sabitliyin ən mühüm təminatlarından biridir. Nəqliyyat marşrutlarının açılması, ticarət əlaqələrinin genişlənməsi və qarşılıqlı iqtisadi maraqların formalaşması regionda uzunmüddətli sülhün əsasını yaradır. Bu baxımdan Zəngəzur dəhlizi yalnız kommunikasiya layihəsi deyil, həm də sülh və əməkdaşlıq platformasıdır”.
İctimai birlik sədrinin sözlərinə görə, layihə Türk dünyasının inteqrasiyası baxımından da xüsusi əhəmiyyət daşıyır. Zəngəzur dəhlizi Azərbaycan ilə Türkiyə arasında birbaşa quru əlaqəsini daha da gücləndirməklə yanaşı, Mərkəzi Asiya ölkələri ilə nəqliyyat və ticarət münasibətlərinin inkişafına əlavə imkanlar yaradacaq.
“Bu dəhliz Türk Dövlətləri Təşkilatına üzv ölkələr arasında iqtisadi və humanitar əlaqələrin genişlənməsinə xidmət edən mühüm strateji xətdir. Eyni zamanda, Avropa bazarları ilə Mərkəzi Asiya arasında yükdaşımaların daha sürətli və səmərəli həyata keçirilməsinə şərait yaradacaq”, – deyə Aqil Camal bildirib.
Bölmənin digər xəbərləri
