AVROPA PARLAMENTİ TÜRKİYƏNİN AVROPA BİRLİYİNƏ DAXİL OLMASI BARƏDƏ DANIŞIQLARINBAŞLANMASINA RAZIDIR
AZƏRTAC-ın xüsusi müxbiri xəbər verir ki, Avropa Parlamentinin oktyabrın 6-da Brüsseldə keçirilən iclasında Avropa Komissiyası, nəhayət, Türkiyənin Avropa Birliyinə üzv ölkələr sırasına qəbul edilməsi barədə AB-Türkiyə danışıqlarının başlanmasını məsləhət bilmişdir. İclas Avropa televiziya kanalları ilə translyasiya edilmişdir.
Avropa Birliyinin genişlənmə məsələləri üzrə icraçı komissarı Günter Ferhoygen bu barədə öz çıxışında bildirmişdir: “Biz bu gün 40 ildən artıq müddətdə Avropaya inteqrasiyaya cəhd göstərən Türkiyəyə cavab verməliyik. Cavabımız “hə” və “hələ tezdir, gözləməli olacaqsınız”dan ibarətdir. Amma Avropa Komissiyası uzun müzakirələrdən və məsləhətləşmələrdən sonra “hə” cavabına üstünlük vermişdir. Çünki Türkiyə AB və Türkiyə arasında danışıqların başlanması ilə əlaqədar Birliyin qoyduğu öhdəlikləri arzuolunan səviyyədə, uğurla yerinə yetirmişdir”.
Beləliklə, Avropa Parlamenti Avropa Komissiyasının AB-Türkiyə arasında danışıqların başlanmasının labüdlüyü barədə təklifini bəyənmişdir.
Xatırladaq ki, bu barədə qərarı Avropa Birliyi ölkələrinin dövlət və hökumət başçıları dekabrın 17-də keçirəcəkləri zirvə toplantısında qəbul edəcəklər.
Bölmənin digər xəbərləri
