AVROPA ŞURASI BAKIDA MEDİA AZADLIĞI VƏ ETİKA PROBLEMLƏRİNƏ HƏSR OLUNMUŞ SEMİNAR KEÇİRİR
Seminarın açılışında çıxış edən Britaniya parlamentinin üzvü, Avropa Şurası Parlament Assambleyasının (AŞPA) Media üzrə alt komitəsinin sədri Robert Uolter, Milli Məclisin Beynəlxalq münasibətlər və parlamentlərarası əlaqələr daimi komissiyasının sədri, AŞPA-da Azərbaycan parlament nümayəndə heyətinin rəhbəri, universitetin rektoru, professor Səməd Seyidov, Avropa Şurası baş katibinin Azərbaycandakı xüsusi nümayəndəsi Denis Bribosia, Milli Məclisin deputatı Rafael Hüseynov tədbirin əhəmiyyətini vurğulamış, onun işinə uğurlar arzulamışlar.
Prezidentin İcra Aparatının İctimai-siyasi məsələlər şöbəsinin müdiri Əli Həsənov Azərbaycanda söz və mətbuat azadlığının təmin olunması sahəsində dövlətin həyata keçirdiyi geniş tədbirləri, bütün qanunvericilik aktlarının, o cümlədən KİV-lə bağlı qanunların Avropa standartlarına uyğunlaşdırıldığını xatırlatmış, eyni zamanda jurnalistlərin məsuliyyətindən söhbət açmışdır. O demişdir ki, bəzi mətbu orqanlar, yaradıcı kollektivlər bilərəkdən, yaxud da hansısa siyasi və ya subyektiv amillərin təsiri altında azad fikrin sərhədi ilə qanun pozuntusunun sərhədini qarışdırır, əlverişli fəaliyyət mühitinin yaradılmasına mane olurlar. Ə.Həsənov media sahəsində problemlərdən danışarkən, mətbuatın siyasiləşməsini başlıca bəla kimi vurğulamışdır: “Bu gün ofisindən çıxarılması ilə bağlı narahatlıq keçirdiyimiz “Azadlıq” qəzeti də daxil olmaqla, Azərbaycanın əsas müxalifət mətbuatının rəhbərləri həm də siyasi partiyaların sədrləri, ya sədr müavinləri, yaxud həmin partiyanın idarə heyətinin üzvləridir. Avropada isə bu yoxdur. Jurnalist hakimiyyət uğrunda mübarizə aparırsa, o, artıq jurnalist deyil, onun fikri, mülahizəsi jurnalist fikrindən və mülahizəsindən uzaqdır. Bunu avropalı qonaqlarımız da yaxşı bilir... Məsuliyyətsiz azadlıq ola bilməz”.
Ə.Həsənov əmin olduğunu bildirmişdir ki, seminarda Azərbaycan mediasının problemləri açıqlıq və şəffaflıqla müzakirə ediləcək, vəziyyətdən çıxış yolları barədə təkliflər səslənəcəkdir.
Sonra seminar “Jurnalistlərin təlimi: konsepsiyalar və praktika”, “Təlimin məqsədləri: jurnalistika etikası, medianın özünütənzimi və qanun” sessiyalarında işini davam etdirmişdir. Jurnalistika və medianın idarə olunması üzrə Qafqaz məktəbinin dekanı xanım Maya Mikaşavidzenin (Gürcüstan) “Jurnalistika təliminin mühüm komponentləri”, Azad Səs/İdarəetmə və Media Akademiyasının təmsilçisi xanım Vera İllesin (Niderland) “Avropa yayım birliyi: media etikası tədrisinə dair çağırışlar”, Media hüququ institutunun direktoru Rəşid Hacılının (Azərbaycan) “Məxfilik, defamasiya və mənfi çıxışlar haqqında qanunlar fonunda jurnalistika standartlarının tədrisi”, Avropa Jurnalistlər Federasiyası Rəhbər Komitəsinin üzvü, Almaniya Mətbuat Şurasının üzvü Volfqanq Mayerin “Jurnalist etikası və medianın özünü tənzimi” məruzələri dinlənilmişdir.
Müzakirələrdə Milli Məclisin deputatı Elmira Axundova, Tbilisi Dövlət Universitetinin müəllimi David Payçadze, Bakı Dövlət Univertsitetinin müəllimi Aynur Bəşirli iştirak etmiş, mülahizə və təkliflərini söyləmişlər.
Seminar noyabrın 30-da öz işini davam etdirəcəkdir.
Bölmənin digər xəbərləri
