Avstraliya ABŞ və İranı danışıqları davam etdirməyə çağırıb
Bakı, 12 aprel, AZƏRTAC
Avstraliya ABŞ və İranı ikihəftəlik atəşkəsi uzatmağa və danışıqları davam etdirməyə çağırıb.
AZƏRTAC xarici mediaya istinadla xəbər verir ki, Avstraliyanın xarici işlər naziri Penni Vonq bazar günü ABŞ və İran rəsmilərinin Pakistanın vasitəçiliyi ilə aparılan marafon sülh danışıqları zamanı razılığa gələ bilməməsindən məyusluğunu ifadə edərək, hər iki tərəfi atəşkəsi davam etdirməyə və danışıqlar masası arxasına qayıtmağa çağırıb.
1979-cu il İran İnqilabından bəri Vaşinqton və Tehran arasında ən əhəmiyyətli qarşılıqlı əlaqə kimi qiymətləndirilən Pakistanın paytaxtı İslamabadda keçirilən əlamətdar görüşdə fevralın 28-də başlayan İran müharibəsinə son qoymaq üçün irəliləyiş əldə edilə bilməyib. Bu fikri ifadə edən Vonq bildirib ki, tərəflərin İslamabadda razılığa gələ bilməməsi “məyusedicidir”.
O əlavə edib: “İndi prioritet vəzifə atəşkəsi davam etdirmək və danışıqlara qayıtmaq olmalıdır. Biz bu münaqişənin tez bir zamanda həllini görmək istəyirik. Münaqişənin hər hansı bir eskalasiyası daha böyük insan itkisinə səbəb olacaq və qlobal iqtisadiyyata daha mənfi təsir edəcək”.
Bölmənin digər xəbərləri
