Avtomobillərdən pul və qızıl-zinət əşyası oğurlayan şəxslər polis tərəfindən yaxalanıb
Bakı, 30 yanvar, AZƏRTAC
Yanvarın 2-dən 27-dək olan müddətdə Nəsimi rayonunda səkkiz avtomobildən ümumilikdə 870 manat məbləğində pul, 2500 manat dəyərində qızıl-zinət əşyası, mobil telefon, sənəd, videoqeydiyyat və naviqator qurğusu oğurlamaqda şübhəli bilinən Bakı şəhər sakini, əvvəllər məhkum olunmuş K.Nəcəfov rayon polis idarəsinin 19-cu polis şöbəsi əməkdaşlarının keçirdikləri əməliyyat-axtarış tədbirləri nəticəsində tutulub.
Daxili İşlər Nazirliyinin mətbuat xidmətindən AZƏRTAC-a bildiriblər ki, elə həmin polis şöbəsinin əməkdaşlarının keçirdikləri digər əməliyyat-axtarış tədbirləri nəticəsində yanvarın 17-dən 24-dək olan müddətdə rayonda beş avtomobildən 300 manat məbləğində pul, maqnitofon, üç ədəd səsgücləndirici, ərzaq məhsulu oğurlamaqda şübhəli bilinən Bakı şəhər sakini T.Novruzov yaxalanıb.
Faktlarla bağlı araşdırmalar aparılır.
Bölmənin digər xəbərləri
