AXCP RƏHBƏRLƏRİ MƏLUM HƏQİQƏTİ TƏHRİF EDİRLƏR
2002-ci il ABŞ-Azərbaycan münasibətlərinə yeni təkan verdi - “Azadlığa Dəstək Aktı”na ədalətsiz 907-ci düzəlişin qüvvəsi dayandırıldı. Azərbaycan Prezidenti Heydər Əliyev Nyu-Yorkda səfərdə olarkən dövlət katibinin birinci müavini Riçard Armitacla telefon söhbəti zamanı belə bir fikir vurğulandı ki, bu addım iki ölkə arasında hərtərəfli əlaqələrin inkişafına səbəb olacaqdır. 10 il ərzində Amerika hökumətinin yardımından ədalətsizcəsinə məhrum edilən Azərbaycan bundan sonra təhsil sahəsindən tutmuş kənd təsərrüfatı sektorunun inkişafınadək Birləşmiş Ştatların yardımından istifadə edə biləcəkdir.
1992-ci ildən bəri 907-ci düzəliş Ermənistan-Azərbaycan münaqişəsinə Birləşmiş Ştatların qərəzli münasibətini əks etdirsə də, onun aradan qaldırılması bu düzəlişi qəbul etdirməyə müvəffəq olan erməni lobbisinin güclü səyləri nəticəsində problemə çevrilmişdi. 907-nin ləğvi vasitələri, onun mövcudluğu şəraitində ABŞ-la əməkdaşlıq yollarının axtarılması məsələləri müntəzəm müzakirə obyektinə çevrilsə də, düzəlişin qəbul edilmə səbəblərinin - guya Azərbaycanın Ermənistana və Dağlıq Qarabağa qarşı təcavüzü və onları blokadada saxlaması barədə iddianın cəfəngliyi və əsassızlığı şübhə doğurmurdu.
Azərbaycan Xalq Cəbhəsi Partiyasının rəhbərləri - Milli Məclisin deputatları Əli Kərimovun və Asim Mollazadənin Vaşinqtona ötən həftəki səfəri zamanı 907-ci düzəlişin qəbul olunma səbəblərini tamamilə başqa cür izah etmələri ən azı təəssüf və təəccüb doğurur. Onların görüşlərindən biri də “Vaşinqton Tayms” qəzetinin redaksiyasında olmuşdur. Qəzetin 30 yanvar tarixli nömrəsində dərc edilmiş məqalədə Əli Kərimov və Asim Mollazadənin Vaşinqton görüşləri haqqında məlumat verilir. Müxalifət partiyanı təmsil etdiklərinə baxmayaraq, ölkəmizin antiterror koalisiyasında iştirakını məmnunluqla vurğulayan deputatlar Azərbaycanın özünün də islam və erməni terrorçularının hədəfi olduğunu etiraf edirlər. Lakin daha sonra cəbhəçilər, nədənsə, həqiqəti tam təhrif edərək bildirirlər ki, prezident Buş Azərbaycanın koalisiyaya dəstəyini qiymətləndirmək məqsədi ilə “1993-cü ildə ölkədə insan haqlarının və demokratiyanın aşağı səviyyədə olması” üzündən qəbul edilmiş qadağaları dayandırmışdır. Məqalədən belə çıxır ki, guya bu qadağalar demokratik yolla seçilmiş Əbülfəz Elçibəyi devirərək, Heydər Əliyevi vəzifəyə gətirmək məqsədi ilə baş vermiş “çevrilişə” cavab olaraq tətbiq edilmişdir.
“Vaşinqton Tayms”ın 5 fevral tarixli nömrəsində Azərbaycanın Vaşinqtondakı səfirliyinin birinci katibi Elin Süleymanovun həmin məqaləyə cavab olaraq redaksiyaya göndərdiyi məktubu dərc edilmişdir. Məktubda 907-ci düzəlişin qəbul edilməsinin əsl səbəbləri vurğulanır. Düzəlişin “1992-ci ildə Birləşmiş Ştatlarda Azərbaycanın nümayəndəliyi olmadığı vaxt, erməni lobbisinin təsiri altında Konqres tərəfindən qəbul edildiyini və bunun Prezident Heydər Əliyevin 1993-cü ildə hakimiyyətə gəlməsindən çox əvvəl olduğunu” bildirən E.Süleymanov daha sonra xatırladır ki, düzəlişin qəbul edilməsi, əslində, Əli Kərimov və Asim Mollazadə də daxil olmaqla, Əbülfəz Elçibəyin başçılıq etdiyi Xalq Cəbhəsinin hakimiyyətdə olduğu dövrə təsadüf edir. 907-ci düzəlişin qəbul olunmasının Azərbaycandakı daxili siyasi vəziyyətlə və Heydər Əliyevin hakimiyyətə gəlməsi ilə heç bir əlaqəsi yoxdur: “Bu düzəliş, guya “Azərbaycanın Ermənistana və Dağlıq Qarabağa qarşı təcavüzünə və onları blokadada saxladığına” görə qəbul edilmişdi və Ermənistanın təcavüzündən əziyyət çəkən Azərbaycana qarşı daha bir təhqir idi. Məktubun sonunda deyilir ki, 1993-cü ilin hadisələrinə gəldikdə, Heydər Əliyev Azərbaycanı müstəqil inkişaf yolundan çəkindirmək istəyənlərin planlarını dağıdaraq ölkəni xilas etmişdir. Daha sonra o, Azərbaycan Konstitusiyasına uyğun olaraq, prezident seçilmişdir.
Şəfəq Akifqızı
AZƏRTAC-ın xüsusi müxbiri
VAŞİNQTON
Bölmənin digər xəbərləri
