Azərbaycan ağırlıqqaldıranı Qran-Pri yarışında qızıl medal qazanıb
Bakı, 13 dekabr, AZƏRTAC
Azərbaycan ağırlıqqaldıranı Dadaş Dadaşbəyli Qətərin paytaxtı Dohada keçirilən Beynəlxalq Ağırlıqqaldırma Federasiyasının II Qran-Pri yarışının qalibi olub.
AZƏRTAC xəbər verir ki, 109 kiloqram çəki dərəcəsində çıxış edən atlet birdən qaldırmada 176 kiloqramı ram edib və bu hərəkətdə qızıl medal qazanıb.
O, təkanla qaldırma hərəkətində isə 212 kiloqramı başı üzərinə qaldıraraq gümüş medala sahib çıxıb.
Toplam 388 (176+212) kiloqram nəticə göstərən D. Dadaşbəyli yekun sıralamada da hamını qabaqlayıb və öz çəkisində çempion olub.
Qeyd edək ki, “Paris-2024” Yay Olimpiya Oyunlarına lisenziya xarakterli turnirdə 70-dən çox ölkədən 382 (176 qadın + 206 kişi) atlet iştirak edir.
Bölmənin digər xəbərləri
