Azərbaycan bugünkü uğurlarına görə ulu öndər Heydər Əliyevə borcludur
Bakı, 10 may (AZƏRTAC). Azərbaycan bugünkü uğurlarına görə məhz ulu öndər Heydər Əliyevə borcludur.
Bu sözləri mayın 10-da ulu öndər Heydər Əliyevin xatirəsini yad etmək üçün Fəxri xiyabana gəlmiş Azərbaycan Milli Elmlər Akademiyasının (AMEA) müxbir üzvü, Əməkdar Elm Xadimi, professor Fəzilə Səmədova AZƏRTAC-a müsahibəsində demişdir.
Fəzilə Səmədova Ümummilli Liderin təşəbbüsü ilə prioritet sahə olan təhsil sisteminin əsaslı surətdə təkmilləşdirilməsi, beynəlxalq standartlara uyğunlaşdırılması və dünya təhsil sisteminə inteqrasiyasına zəmin yaradan köklü islahatları həyata keçirdiyini qeyd edərək demişdir: “Ölkəmizdə bütün sahələrdə olduğu kimi, elm və təhsilin inkişafında da Ulu Öndərin misilsiz xidmətləri heç zaman unudulmayacaqdır. Azərbaycan var olduqca, ümummilli lider Heydər Əliyevin də xatirəsi yad ediləcəkdir”.
F.Səmədova zəmanəmizin görkəmli şəxsiyyətlərindən biri olan dahi rəhbər Heydər Əliyevin əbədiyaşarlıq qazanmış xatirəsinin əsrlər boyu yaddaşlarda yaşayacağını, onun gördüyü işləri bütün zamanlarda öz dəyərini qoruyub saxlayacağını əminliklə vurğulamışdır. Bu gün Azərbaycan dünya birliyinin tamhüquqlu üzvü kimi tanınırsa, dünyaya inteqrasiya proseslərində fəal iştirak edirsə, bu, dahi şəxsiyyət Heydər Əliyev siyasi uzaqgörənliyi və qüdrətinin təcəssümüdür.
Bölmənin digər xəbərləri
