AZƏRBAYCAN DAHA BİR BEYNƏLXALQ TƏŞKİLATDA MÜŞAHİDƏÇİ STATUSU QAZANMIŞDIR
Aprelin 8-də Cənub-Şərqi Avropada Əməkdaşlıq Təşəbbüsü Təşkilatının transmilli cinayətkarlıq üzrə regional mərkəzinin (SECİ) Birgə Əməkdaşlıq Komitəsinin iclasında Azərbaycan Respublikası yekdilliklə bu təşkilata müşahidəçi statusu ilə qəbul olunmuşdur.
İclasda Azərbaycan Respublikasının Rumıniyadakı səfiri Eldar Həsənov Azərbaycan Respublikası Hökuməti adından səlahiyyətli nümayəndə kimi iştirak edərək, transmilli cinayətkarlıq, qaçaqmalçılıq, narkotik vasitələrin qanunsuz dövriyyəsi ilə mübarizə, bu sahələrə dair Azərbaycanın qoşulduğu beynəlxalq konvensiyalar, ölkəmizdə aparılan hüquqi islahatlar, qəbul olunan yeni qanunlar, hüquq-mühafizə orqanlarının qarşılıqlı fəaliyyətinə dair məruzə ilə çıxış edərək Azərbaycan Respublikasının Avropada çox nüfuzlu bir beynəlxalq təşkilata daxil olmasının məqsədini açıqlamışdır.
Cənub-Şərqi Avropada Əməkdaşlıq Təşəbbüsü Təşkilatı 1998-ci ildən fəaliyyət göstərir və Avropa ölkələri arasında iqtisadi əməkdaşlığın inkişaf etdirilməsi, regionda tranzit-ticarət sisteminin yaxşılaşdırılması, bütün növ cinayətlərə, o cümlədən, terrorizm, mütəşəkkil çinayətkarlıq, transmilli cinayətkarlıq, insan alveri, qeyri-qanuni silah alveri, narkotiklərin qanunsuz dövriyyəsi, maliyyə və yüksək texnologiyalar sahəsində cinayətlər, qaçaqmalçılıq, nəqliyyat vasitələrinin qaçırılması və sair növ cinayətlərə qarşı mübarizə aparır. Təşkilata üzv və müşahidəçi ölkələrin müvafiq orqanları arasında SECİ-nin daimi müşavirləri olan İnterpolun və Avropolun köməyi ilə yaradılmış məlumat-informasiya bazası əsasında geniş informasiya mübadiləsi edilir və birgə mübarizə tədbirləri həyata keçirilir.
Fevralın 25-də Cənub-Şərqi Avropada Əməkdaşlıq Təşəbbüsü Təşkilatının transmilli cinayətkarlıqla mübarizə üzrə regional mərkəzinin illik fəaliyyətinə dair hesabatının dinlənildiyi tədbirə Azərbaycan Respublikasının nümayəndəsi də dəvət edilmişdi. Həmin tədbirdə Azərbaycan Respublikasını ölkəmizin Rumıniyadakı səfiri Eldar Həsənov təmsil etmişdi.
Təşkilat son illərdə bir neçə ciddi əməliyyatlar keçirmiş, böyük uğurlar qazanmışdır. Məhz buna görə də Avropa İttifaqına üzv olan ölkələr tərəfindən transmilli cinayətkarlığa qarşı mübarizə məqsədi ilə yaradılmış Sabitlik Paktı Təşkilatının cinayətkarlığa qarşı müvafiq mübarizə qurumlarının SECİ Mərkəzi ilə birləşməsi vacib hesab edilmişdir.
Azərbaycan Respublikasının Cənub-Şərqi Avropada Əməkdaşlq Təşəbbüsü Təşkilatına əvvəlcə müşahidəçi, sonra isə üzv qəbul olunması bir sıra cəhətlərdən çox əhəmiyyətlidir. Çünki Azərbaycan Avropada, xüsusilə Cənub-Şərqi Avropa regionunda transmilli cinayətkarlığa qarşı mübarizədə əməli işinə görə ən nüfuzlu təşkilatlardan birinə üzv olmaqla həm bu qurumun əhatə etdiyi sahələr üzrə geniş təcrübə əldə etmiş olacaq, həm də üzv ölkələrlə əməkdaşlığın inkişafı üçün yeni imkanlar qazanacaqdır. SECİ-nin Avropa İttifaqının Sabitlik Paktı və ABŞ-ın Dövlət Departamenti ilə də sıx əməkdaşlığını nəzərə alsaq, ölkəmizin bu sahələrdə əməkdaşlıq və təcrübə dairəsi daha da genişlənir. SECİ-yə daxil olmaqla, Azərbaycan ölkəmizin ərazisindən qaçaqmalçılıq, narkotik vasitələrin daşınması üçün istifadə edilməsi cəhdlərinin qarşısını öz daxili imkanları ilə yanaşı beynəlxalq təşkilatların yaxından köməyi ilə almaq imkanını əldə edəcəkdir.
Azərbaycan SECİ-nin terrorizm, qaçaqmalçılıq, mütəşəkkil cinayətkarlıq, narkotik vasitələrin qanunsuz dövriyyəsi, insan alveri və təşkilatın əhatə dairəsinə daxil olan digər sahələrdə mübarizə üsullarının mənimsənilməsi və qanunvericiliyin təkmilləşdirilməsi üçün əlavə imkan əldə etməklə, SECİ çərçivəsində informasiya mübadiləsindən bəhrələnəcəkdir.
Ən əsas və mühüm amillərdən biri də odur ki, bu gün Azərbaycan Respublikası erməni terrorizminin mahiyyətini, Ermənistan Respublikası tərəfindən işğal olunmuş Azərbaycan ərazilərindən ermənilərin öz cinayətkar məqsədləri üçün istifadə etmələrini, bu ərazilərdən narkotik vasitələrin əkilib-becərilməsi və daşınması məqsədi ilə istifadə olunmasını, terrorçu qrupların hazırlanması haqqında həqiqətləri faktlar əsasında dünya ictimaiyyətinin və beynəlxalq qurumların diqqətinə çatdırmaqla, müvafiq tədbirlərin görülməsi istiqamətində əlverişli imkan əldə etmiş olacaqdır.
Bölmənin digər xəbərləri
