“Azərbaycan deyəndə” layihəsinin təqdimatı keçirilib
Bakı, 13 iyul, AZƏRTAC
Azərbaycan Respublikası Gənclər və İdman Nazirliyinin və “Müasir Azərbaycan Gənci” (MAG) verilişinin birgə təşkilatçılığı ilə “Azərbaycan deyəndə” layihəsinin təqdimatı keçirilib.
Gənclər və İdman Nazirliyinin mətbuat xidmətindən AZƏRTAC-a bildiriblər ki, əvvəlcə Azərbaycan Respublikasının Dövlət Himni səsləndirilib, Vətən uğrunda canından keçmiş şəhidlərimizin ruhu bir dəqiqəlik sükutla yad edilib.
Tədbirdə çıxış edən gənclər və idman nazirinin müavini İntiqam Babayev bildirib ki, “Azərbaycan deyəndə” layihəsinin əsas hədəfi Azərbaycan həqiqətlərinin, tariximizin, mədəni irsimizin və ölkəmizin uğurlarının beynəlxalq aləmdə təbliğində gənclərin fəal iştirakına şərait yaratmaqdır. Layihə çərçivəsində gənclərə sosial mediada işləmək sahəsində müvafiq biliklərin verilməsi və digər tədbirlərin reallaşdırılmasının da nəzərdə tutulduğunu qeyd edən İntiqam Babayev hamını bu prosesdə fəal iştiraka dəvət edib.
Sonra “Azərbaycan deyəndə” layihəsinin saytı (https://azerbaijan-is.com/)
qonaqlara təqdim olunub. Eləcə də “Azərbaycan deyəndə nələr edə bilərik?” mövzusunda müzakirələr aparılıb, təkliflər irəli sürülüb.
Tədbirdə gənclər təşkilatlarının rəhbərləri, yaradıcı gənclər, gənc alimlər, media nümayəndələri, sosial media mütəxəssisləri iştirak ediblər.
Bölmənin digər xəbərləri
