Azərbaycan Gəncləri Gününə həsr edilən loqo müsabiqəsinin qalibi müəyyənləşib
Bakı, 31 yanvar, AZƏRTAC
Gənclər və İdman Nazirliyinin Azərbaycan Gəncləri Günü münasibətilə yanvarın 13-də rəssam və dizaynerlər arasında elan etdiyi loqo müsabiqəsinin qalibi müəyyənləşib.
Nazirliyin mətbuat xidmətindən AZƏRTAC-a bildiriblər ki, yanvarın 18-dək davam edən müsabiqənin əsas şərti loqonun 2 fevral - Azərbaycan Gəncləri Gününü dolğun əks etdirməsi olub.
Müsabiqəyə 97 müəllif tərəfindən 300-dən çox loqo təqdim edilib. Həmin loqolar arasından Ehtiram İbrahimovun təqdim etdiyi loqo qalib seçilib. İyirmi altı yaşlı İbrahimov Ehtiram Etibar oğlu qrafik dizaynerdir. O, hazırda “Code Akademiya”da qrafik və veb-dizayn üzrə təhsil alır.
Müsabiqənin qalibi 2 fevral - Azərbaycan Gəncləri Günü münasibətilə istedadlı və yaradıcı gənclərin mükafatlandırılması mərasimində təltif olunacaq.
Bölmənin digər xəbərləri
