Azərbaycan İİV-ə yoluxma səviyyəsi aşağı olan ölkələr sırasına daxildir
Bakı, 1 dekabr, AZƏRTAC
İİV/QİÇŞ problemi Azərbaycanda da ən aktual problem olaraq qalır və daim Səhiyyə Nazirliyinin nəzarətindədir.
Nazirliyin mətbuat xidmətindən AZƏRTAC-a verilən məlumata görə, Azərbaycan İİV-ə yoluxma səviyyəsi aşağı olan ölkələr sırasına daxildir. Buna baxmayaraq İİV epidemiyasının müntəzəm aparılan monitorinqi onun əsasən yoluxmaya yüksək riskli əhali qrupuna aid olan inyeksion narkotik istifadəçiləri arasında yayılmasını təsdiqləyir.
Bu ilin 11 ayı ərzində ölkəmizdə yeni İİV-ə yoluxma faktı aşkar olunaraq 561 nəfər qeydiyyata alınıb. Onlardan 545-i Azərbaycan vətəndaşı, 16 nəfəri isə əcnəbidir. Qeydiyyata alınmış 545 Azərbaycan vətəndaşından 336-sı kişi, 209-u isə qadındır.
Ümumilikdə Azərbaycanda ilk dəfə İİV infeksiyasının aşkar edildiyi 1987-ci ildən 2014-cü il dekabrın 1-dək Respublika QİÇS-lə Mübarizə Mərkəzində İİV infeksiyası təsdiq olunmuş 4859 nəfər rəsmi qeydiyyata götürülüb. Onların 4694 nəfəri Azərbaycan vətəndaşı, 165-i isə əcnəbidir. İİV-ə yoluxmuş Azərbaycan vətəndaşlarından 3572-si kişi, 1122 nəfəri isə qadındır. QİÇS mərhələsində olan insanların sayı 1508 nəfərə çatır ki, onlardan 1484-ü Azərbaycan vətəndaşıdır. İİV infeksiyasından 667 nəfər dünyasını dəyişib. Ölənlərin 667 nəfəri Azərbaycan vətəndaşı olub. İİV-ə yoluxmuş 4694 Azərbaycan vətəndaşından 1198-i Bakı şəhəri və Abşeron rayonunda, 3656-sı respublikanın digər 55 inzibati ərazisində qeydiyyatda olan şəxslərdir, 38 nəfərin yaşayış yeri naməlumdur. 4694 nəfər Azərbaycan vətəndaşından 2578-də İİV-ə yoluxma inyeksion narkotik istifadəsi nəticəsində, 1637-də heteroseksual, 61-də homoseksual kontakt nəticəsində, 82-də anadan uşağa keçməklə, 1-də donor qanının köçürülməsi nəticəsində baş verib. 336 nəfərdə yoluxma yolu müəyyən edilməyib.
İİV-lə yaşayan insanlara müalicə, qulluq və dəstəyin göstərilməsinin təmin edilməsi işi Respublika QİÇS-lə Mübarizə Mərkəzində davam etdirilir. Belə ki, 2006-cı il noyabrın 8-dən tətbiq edilən antiretrovirus terapiyaya hazırda 2323 nəfər İİV-lə yaşayan insan cəlb olunmuş, onlardan 552 nəfərə bu ilin 11 ayı ərzində müalicə başlanılıb. Eyni zamanda, müalicənin təşkili təkmilləşdirilərək Səhiyyə Nazirliyi tərəfindən Qlobal Fondun layihəsi çərçivəsində respublikanın 6 regionunda ART mərkəzləri yaradılıb. İİV-ə görə müayinənin əlçatanlığını təmin etmək məqsədi ilə ölkə ərazisində 50 məntəqədən ibarət könüllü məsləhət və müayinə şəbəkəsi yaradılmaqdadır. Hazırda 43 məntəqə fəaliyyət göstərir. İİV müayinələrinə yüksək riskli əhali qruplarını cəlb edilməsi üçün Bakıda və regionlarda 12 səyyar məntəqədən istifadə olunur.
İİV/QİÇS-in qarşısının alınması məqsədi ilə Respublika QİÇS-lə Mübarizə Mərkəzi bir çox ali və orta ixtisas təhsil müəssisələrində, ticarət mərkəzlərində və digər obyektlərdə könüllülük prinsipi əsasında müayinə aksiyaları keçirib, broşür, banner dərc edilmişdir.
Bölmənin digər xəbərləri
