Azərbaycan ilə Türkiyə arasında ailə və sosial xidmətlər məsələləri ətrafında fikir mübadiləsi aparılıb
Bakı, 18 oktyabr, AZƏRTAC
Oktyabrın 18-də Ailə, Qadın və Uşaq Problemləri üzrə Dövlət Komitəsinin sədri Bahar Muradova Azərbaycan Qadınlarının VI Qurultayında iştirak etmək üçün ölkəmizə gələn Türkiyənin ailə və sosial xidmətlər naziri Mahinur Özdemir Göktaşın başçılıq etdiyi nümayəndə heyəti ilə görüşüb.
AZƏRTAC xəbər verir ki, görüşdə çıxış edən Bahar Muradova Azərbaycanla Türkiyə arasında əlaqələrin tarixinin çox qədim olduğunu deyib. Bildirilib ki, biz iki dövlət, bir xalqıq. Sevincli və kədərli günlərimizdə daim bir-birimizin yanında olmuşuq. Əldə etdiyimiz bugünkü uğurlar, nailiyyətlər də məhz bu birliyə söykənir.
Türkiyənin Ailə və Sosial Xidmətlər Nazirliyi ilə Azərbaycanın Ailə, Qadın və Uşaq Problemləri üzrə Dövlət Komitəsi arasında əlaqələrin tarixinə nəzər salan Bahar Muradova münasibətlərin səviyyəsindən məmnunluğunu ifadə edib. O, iki qurum arasında niyyət protokolu, onun əsasında hazırda ardıcıl şəkildə icra olunan fəaliyyət planından söz açıb. Plan üzrə işlərin uğurla davam etdiyini vurğulayan komitə sədri təcrübə mübadiləsinin önəmini qeyd edib, bunun əməkdaşlığın güclənməsi ilə bərabər, xalqımıza da xidmət üçün əhəmiyyətli olduğunu deyib.
Oktyabrın 18-nin Azərbaycanda əlamətdar günlərdən biri olduğunu söyləyən Bahar Muradova qeyd edib ki, məhz həmin tarixdə ölkəmiz ikinci dəfə müstəqilliyini bəyan edib. Diqqətə çatdırılıb ki, artıq üçüncü ildir Azərbaycan bu günü qalib ölkə kimi qeyd edir. Bu il isə xüsusilə əhəmiyyətlidir. Çünki bu il oktyabrın 15-də Prezident, Müzəffər Ali Baş Komandan İlham Əliyev Xocalıya, Xocavəndə, Ağdərəyə, Xankəndiyə səfər etdi, bu ərazilərə Azərbaycan Bayrağını sancdı. Oktyabrın 15-dən başlanan dövr artıq Azərbaycanın bütün ərazilərində suveren hüquqlarının bərpa edildiyi və əsl mənada, müstəqil ölkə olduğu gündür. Komitə sədri həm 44 günlük Vətən müharibəsi, həm də sentyabrın 19-20-də həyata keçirilən antiterror tədbirləri zamanı Türkiyənin Azərbaycana verdiyi dəstəyi xüsusi vurğulayıb.
B.Muradova ölkəmizdə keçiriləcək Azərbaycan qadınlarının VI Qurultayı ilə bağlı məlumat verib. Xatırladıb ki, Azərbaycan qadınlarının I Qurultayı müstəqilliyimizin ilk illərində Ulu Öndər Heydər Əliyevin təşəbbüsü və iştirakı ilə keçirilib.
Türkiyənin ailə və sosial xidmətlər naziri Mahinur Özdemir Göktaş 18 Oktyabr - Müstəqilliyin Bərpası Günü münasibətilə təbriklərini çatdırıb. Azərbaycan-Türkiyə əlaqələrinin dərin tarixi köklərə malik olduğunu söyləyən nazir qeyd edib ki, hazırda iki dövlət arasındakı münasibətlər müttəfiqlik səviyyəsinə yüksəlib. Qeyd edilib ki, ölkələrimiz arasında dostluq-qardaşlıq münasibətləri xalqlarımızı bir-birinə qarşı daha sıx bağlayıb. O, Türkiyədə baş verən zəlzələnin nəticələrinin aradan qaldırılması istiqamətində Azərbaycanın göstərdiyi dəstəyi yüksək qiymətləndirib.
Qurumlar arasında əməkdaşlıqdan söz açan Mahinur Özdemir Göktaş gələcəkdə bu münasibətlərin daha da inkişaf etdiriləcəyinə inandığını bildirib.
Görüş qarışıqlı maraq doğuran məsələlərin müzakirəsi ilə davam edib.
Bölmənin digər xəbərləri
