AZƏRBAYCAN KOMANDASI PEKİN YAY PARALİMPİYA OYUNLARINDA 10-CU MEDALI QAZANMIŞDIR
AZƏRTAC xəbər verir ki, Çinin paytaxtı Pekində keçirilən XIII Yay Paralimpiya Oyunlarında Azərbaycan yığması daha bir medal qazanmışdır.
Milli komandamızın üzvü, atlet Vüqar Mehdiyev 200 metrlik məsafəyə qaçışda finiş xəttini 22 saniyəyə qət edərək bürünc medala sahib çıxmışdır. İdmançımız finiş xəttinə İrlandiya təmsilçisi Ceyson Smit və Rusiya atleti Aleksey Labzindən gec çıxdığına görə, 3-cü yerlə kifayətlənməli olmuşdur.
Hazırda hesabında 2 qızıl, 3 gümüş, 5 bürünc medal olan Azərbaycan yığması medal qazanan ölkələrin siyahısında 37-ci sırada qərarlaşmışdır. Çin paytaxtında idmançılarımızın əldə etdikləri uğurları yüksək qiymətləndirmək olar. Pekin Paralimpia Oyunlarında Azərbaycanın idman şərəfini 18 idmançı qorumuşdur.
Xatırladaq ki, fiziki cəhətdən qüsurlu idmançılarımız indiyədək ən yüksək göstəriciyə 4 il bundan öncə Afinada nail olmuşlar. Həmin paralimpiadada 11 həmyerlimiz ümumilikdə, 2 qızıl, 1 gümüş, 1 bürünc medal qazanmışdır. Yığmamız isə medalların keyfiyyəti baxımından 136 kollektiv arasında 45-ci yeri tutmuşdu.
Pekin Paralimpiya Oyunlarına sentyabrın 17-də yekun vurulacaqdır.
Bölmənin digər xəbərləri
