Hörmətli xanımlar və cənablar!

Azərbaycanın vahid idman ailəsinin bir üzvü kimi, bu gün biz son dörd ildə görülən işlərin yekunu - 2004-cü il Afina XII Yay Paralimpiya Oyunlarında milli paralimpiya komandamızın əldə etdiyi nəticələr haqqında Sizin qarşınızda böyük qürur hissi ilə hesabat veririk. 2004-cü il ölkəmizin idman salnaməsinə ən uğurlu il kimi daxil olacaqdır. Buna səbəb avqust-sentyabr aylarında Azərbaycan idmançılarının qədim Ellada torpağında keçirilən Oyunlarında ölkəmizi ləyaqətlə təmsil etməsidir.

Sentyabrın 17-28-də keçirilən XII Yay Paralimpiya Oyunlarında dünyanın 136 ölkəsindən 4000-ə yaxın idmançı iştirak etmişdir. Sidneydə 123 ölkədən 3800-dək idmançı təmsil olunmuşdu. Azərbaycanı Afina Paralimpiya Oyunlarında dörd idman növündə on bir idmançı təmsil etmişdir. 2000-ci ildə Sidneydə XI Yay Paralimpiya Oyunlarında isə ölkəmiz üç idman növündə yeddi idmançı ilə təmsil olunmuşdu.

Afinada Azərbaycan idmançılarının yarışa başladığı birinci gün, sentyabrın 19-da təmsilçimiz, Sidney Paralimpiya Oyunlarının gümüş mükafatçısı Yelena Taranova olimpiya güllə atıcılığı mərkəzində çox gərgin və dramatik idman mübarizəsində ölkəmizə ilk medalı qazandırdı. O, təsnifat yarışlarında beşinci nəticə göstərməsinə baxmayaraq, finalda böyük iradə nümayiş etdirərək, üçüncü yerə yüksəlmiş və bürünc mükafatın sahibi olmuşdur. Yarışların üçüncü və dördüncü gününü, sözün əsil mənasında, Azərbaycanın qızıl günləri hesab etmək olar.

Sentyabrın 20-də Olimpiya salonu cüdo həyəcanı yaşayıbdır. Bunun səbəbkarı isə Azərbaycanın ərazi bütövlüyü uğrunda döyüşlərdə hər iki gözünü itirmiş Sumqayıt şəhərinin sakini, Afina Oyunlarının debütantı İlham Zəkiyev idi. Onun yarışdığı çəki dərəcəsi ən ağır, 100 kiloqramdan yuxarı olduğundan azarkeşlərdə böyük maraq doğurmuşdu. Püşkatmanın nəticələrinə görə onun rəqibləri Oyunların favoritləri sayılan Kuba, İspaniya və Böyük Britaniya cüdoçuları idilər. Bütün bu amillər gərgin və çətin idman mübarizəsindən xəbər verirdi. Lakin İlham hər üç güclü rəqibi üzərində təmiz qələbə çalaraq, ölkəmizə ilk qızıl medalı qazandırdı. Onun şərəfinə Azərbaycanın bayrağı qaldırıldı, dövlət himnimiz səsləndi.

Sentyabrın 21-də isə azarkeşlərlə dolu olan, olimpiya məşəlinin alovlandığı məşhur Olimpiya stadionuna toplaşan azarkeşlər daha bir debütant paralimpiyaçımızın böyük nailiyyətini, uzunluğa tullanan Oleq Panyutinin 7 metr 25 santimetr nəticə ilə qazandığı qələbəni alqışlayır, Azərbaycan bayrağına düzlənərək dövlət himnimizi dinləyirdilər. Oleq təsnifat mərhələsində 19 güclü idmançı ilə mübarizəyə başladı və elə ilk cəhddəcə paralimpiya rekordunu təzələdi. Bu nəticə ilə finala çıxan Oleq 5-ci cəhddə yeni dünya rekordu müəyyən etdi.

Yarışların 9-cu günü daha bir idmançımız üçün uğurlu oldu. Sidney Paralimpiya Oyunlarının iştirakçısı Zeynəddin Bilalov ikinci cəhddə üç təkanla 12 metr 88 santimetr uzunluğa tullanaraq gümüş medalın sahibi oldu.

Bu Oyunların debütantı olan və ilk ən güclü on idmançı sırasına daxil olan digər dörd idmançımız da əsil əzmkarlıq göstərərək, yarış meydanlarında ölkəmizi ləyaqətlə təmsil etdilər. Afinada ilk dəfə çıxış edən yüngül atletlər Yuri Qornak və Aleksandr Polişuk sprint qaçış növlərində finala çıxaraq yaxşı nəticə göstərmiş, 4-cü və 5-ci yerləri tutmuşlar. Daha iki debütant atletimiz Əlibala Hüseynov və Bəhruz Bəşirov yadro itələmə yarışlarında 9-cu və 10-cu yerləri tutmuşlar. Pauerliftinq yarışlarında iştirak edən yeganə idmançımız Fuad Tarverdiyev isə 145 kiloqram nəticə göstərərək 14-cü yerlə kifayətlənmişdir.

Azərbaycan komanda hesabında Sidneydəki nəticəni geridə qoyaraq, reytinq cədvəlində 136 ölkə arasında 45-ci yerə çıxmışdır. Komandamız keçmiş SSRİ məkanı ölkələri arasında Ukrayna, Rusiya və Belarusdan sonra 4-cü nəticə göstərmişdir. Bu Oyunlarda cəmi 73 ölkə medal qazanmışdır.

Hörmətli cənab Prezident!

Əldə olunan nailiyyətlər bir daha onu sübut edir ki, Azərbaycan artıq nüfuzlu idman ölkəsinə çevrilmişdir. Afinada Beynəlxalq Paralimpiya Komitəsinin, onun müvafiq idman komitələrinin, inkişaf etmiş ölkələrin və keçmiş SSRİ məkanı ölkələrinin müvafiq qurumlarının rəhbərləri ilə keçirdiyimiz görüşlərdə bu fikir dəfələrlə vurğulandı. Beynəlxalq Paralimpiya Komitəsinin prezidenti cənab Fil Qraven bizimlə görüş zamanı Azərbaycanda idmanın sürətlə inkişaf etdiyini və beynəlxalq paralimpiya yarışlarına ev sahibliyi etmək vaxtının çatdığını söylədi.

Cüdo Federasiyasının prezidenti cənab Bruno Karmeni ilə görüşdə isə o, 2007-ci ildə növbəti Avropa çempionatının Bakıda keçirilməsi haqqında qərarını bizə elan etdi.

Hörmətli cənab Prezident!

Biz paralimpiyaçılar bugünkü uğurların başlanğıcının qoyulduğu tarixi yaxşı xatırlayırıq. Ölkəmizin müstəqillik qazandığı ilk illərdə yaranan xaosun qarşısı yalnız ümummilli liderimiz Heydər Əliyevin 1993-cü ilin iyununda xalqın tələbi ilə hakimiyyətə qayıdışından sonra alınmağa başladı. Digər sahələrdə olduğu kimi, idman sahəsində də baş alıb gedən özbaşınalığın, idman qurğularının ayrı-ayrı işbazlar tərəfindən özəlləşdirilməsinin və dağıdılmasının qarşısı onun gördüyü məqsədyönlü tədbirlər nəticəsində alındı. Ölkədə yaranan ictimai-siyasi sabitlik ayrı-ayrı idman qurumlarının, o cümlədən Milli Paralimpiya Komitəsinin yaranmasına və fəaliyyətinə müvafiq şərait yaratdı. Azərbaycan idmanında inkişafın başlanğıcı isə cənab Prezident, 1997-ci ilin iyulunda məhz Sizin Milli Olimpiya Komitəsinin Prezidenti seçildiyiniz gündən qoyulmuşdur. Həmin dövrdən etibarən ölkəmizdə böyük idman qurğularının və olimpiya komplekslərinin tikilməsi, vahid idman ailəsinin yaradılması və müvafiq qanunvericilik bazasının hazırlanması istiqamətində aparılan məqsədyönlü işlər, ölkəmizdə bir çox beynəlxalq yarışların, o cümlədən olimpiya lisenziya turnirlərinin keçirilməsi və digər saysız-hesabsız müsbət dəyişikliklər bugünkü nailiyyətlərin əsasını qoymuşdur.

Hörmətli cənab Prezident!

Paralimpiya hərəkatına göstərdiyiniz diqqət və qayğıya görə, Afina Paralimpiya Oyunlarında iştirak edən milli paralimpiya komandası adından Sizə dərin təşəkkürümüzü və minnətdarlığımızı bildiririk. Biz bu qayğı və diqqəti, Bakıda olduğu kimi, Afinada da daim hiss edirdik. İdmançıları uğura ruhlandıran da məhz bu amil idi.

Cənab Prezident!

Dörd il əvvəl, 2000-ci ildə məhz həmin bu salonda ümummilli liderimizlə görüş zamanı bizim idmançılarımız, komandamızın üzvləri cənab Heydər Əliyevə söz vermişdilər ki, Afina Paralimpiya Oyunlarına ləyaqətlə hazırlaşıb orada ölkəmizi çox yüksək səviyyədə təmsil edəcəklər. Fürsətdən istifadə edərək, bu gün Sizin qarşınızda da söz vermək istəyirik ki, 2008-ci ildə Pekin şəhərində keçiriləcək XIII Yay Paralimpiya Oyunlarına yüksək səviyyədə hazırlaşacaq, Azərbaycanı orada da layiqincə təmsil edəcəyik.

Diqqətinizə görə minnətdaram.