Azərbaycan-Özbəkistan əlaqələri konkret layihələr və praktiki nəticələrlə zənginləşir ŞƏRH
Bakı, 24 avqust, AZƏRTAC
Prezident İlham Əliyevin Özbəkistana dövlət səfəri Azərbaycan–Özbəkistan münasibətlərinin indiki mərhələsinin həm siyasi, həm iqtisadi, həm də strateji baxımdan nə qədər mühüm olduğunu bir daha nümayiş etdirir. Səfərin gündəliyinin əsasını yüksəksəviyyəli siyasi dialoqun davam etdirilməsi, 3-cü Ali Dövlətlərarası Şuranın iclasının keçirilməsi, əməkdaşlığın yeni istiqamətlərinin müəyyənləşdirilməsi və konkret layihələrin həyata keçirilməsi təşkil edir. Bu baxımdan səfəri yalnız növbəti yüksəksəviyyəli təmas kimi deyil, iki ölkə arasında münasibətlərin yeni inkişaf mərhələsinin mühüm göstəricisi kimi qiymətləndirmək olar.
Bu sözləri AZƏRTAC-a açıqlamasında Milli Məclisin deputatı Nurlan Həsənov söyləyib.
“Azərbaycan və Özbəkistan münasibətlərinin əsas üstünlüyü ondan ibarətdir ki, bu əlaqələr yalnız siyasi bəyanatlar səviyyəsində qalmır, konkret layihələr və praktiki nəticələrlə zənginləşir. Son illərdə iki ölkə arasında siyasi dialoqun intensivliyi əhəmiyyətli dərəcədə artıb və münasibətlər ən yüksək səviyyə olan müttəfiqlik mərhələsinə yüksəlib. Prezident İlham Əliyev də səfər ərəfəsindəki müsahibəsində son beş ildə ən yüksək səviyyədə 15 qarşılıqlı səfər və sıx təmasların həyata keçirildiyini qeyd etmişdi", - deyə N.Həsənov vurğulayıb.
O əlavə edib ki, bu əməkdaşlığın hər iki ölkə üçün mühüm iqtisadi faydaları var. Azərbaycan və Özbəkistan arasında qarşılıqlı ticarətin genişləndirilməsi, investisiyaların artırılması, biznes dairələri və regionlar arasında əməkdaşlığın dərinləşdirilməsi üçün böyük potensial mövcuddur. Xüsusilə nəqliyyat və tranzit sahəsi iki ölkənin strateji maraqlarının kəsişdiyi əsas istiqamətlərdən biridir. Azərbaycan özünün əlverişli coğrafi mövqeyi və nəqliyyat infrastrukturu vasitəsilə Özbəkistanın beynəlxalq bazarlara çıxış imkanlarının genişlənməsində mühüm rol oynaya bilər. Özbəkistan isə Mərkəzi Asiyanın böyük iqtisadi potensiala malik dövlətlərindən biri kimi Azərbaycan üçün həmin regionla əlaqələrin daha da genişləndirilməsi baxımından mühüm tərəfdaşdır. Rəsmi məlumatlarda da nəqliyyat-tranzit imkanlarından səmərəli istifadə, ticarətin artırılması və qarşılıqlı biznes əməkdaşlığının genişləndirilməsi xüsusi prioritet kimi göstərilir.
Səfər çərçivəsində Azərbaycanın Özbəkistanda həyata keçirdiyi layihələrin açılış və təməlqoyma mərasimlərinin keçirilməsi isə münasibətlərin real iqtisadi məzmununu nümayiş etdirir. Bu cür layihələr bir tərəfdən Azərbaycanın Özbəkistan iqtisadiyyatına marağını və investisiya imkanlarını göstərirsə, digər tərəfdən iki ölkənin özəl sektorları arasında uzunmüddətli əməkdaşlıq üçün yeni imkanlar yaradır. Beləliklə, siyasi səviyyədə əldə olunan razılaşmaların iqtisadi layihələrə çevrilməsi Azərbaycan–Özbəkistan münasibətlərinin ən mühüm xüsusiyyətlərindən biridir.
Deputatın fikrincə, Azərbaycanın və Özbəkistanın coğrafi mövqeləri onları Avrasiya nəqliyyat bağlantılarının inkişafında təbii tərəfdaşlara çevirir. Xəzər dənizindən keçən marşrutlar və Şərq–Qərb istiqamətində formalaşan nəqliyyat dəhlizləri Mərkəzi Asiya ilə Cənubi Qafqazı və Avropa bazarlarını daha sıx birləşdirə bilər. Bu baxımdan Bakı ilə Daşkənd arasında nəqliyyat əməkdaşlığının gücləndirilməsi təkcə ikitərəfli münasibətlər üçün deyil, daha geniş regional iqtisadi əlaqələrin inkişafı baxımından da əhəmiyyətlidir.
“Azərbaycan və Özbəkistan əməkdaşlığının strateji dəyəri yalnız iqtisadi göstəricilərlə məhdudlaşmır. İki ölkə arasında ortaq tarix, dil, mədəniyyət və mənəvi dəyərlər üzərində formalaşan münasibətlər siyasi etimad üçün möhkəm baza yaradır. Prezident İlham Əliyev də bu amilləri iki ölkə arasındakı münasibətlərin əsas dayaqları kimi vurğulayıb.
Humanitar və mədəni əlaqələr də bu strateji tərəfdaşlığın mühüm hissəsidir. Xalqların tarixi və mədəni yaxınlığı dövlətlərarası münasibətlərin cəmiyyətlər səviyyəsində də möhkəmlənməsinə imkan verir. Bu isə siyasi və iqtisadi əməkdaşlığın daha davamlı olmasına xidmət edir.
Ali Dövlətlərarası Şuranın 3-cü iclası ayrıca əhəmiyyət daşıyır. Belə bir mexanizmin mövcudluğu münasibətlərin institusional əsaslarını möhkəmləndirir və iki ölkə arasında əldə olunan razılaşmaların ardıcıl şəkildə icrasına imkan yaradır. 2024-cü ildə Daşkənddə Şuranın ilk iclasının keçirilməsi və münasibətlərin həmin dövrdə müttəfiqlik səviyyəsinə yüksəldilməsi bu gün əldə olunan nəticələrin siyasi əsasını formalaşdırıb”, - deyə Nurlan Həsənov vurğulayıb.
Bölmənin digər xəbərləri
