AZƏRBAYCAN PREZİDENTİ İLHAM ƏLİYEVİN BƏYANATI
Hörmətli qonaqlar, xanımlar və cənablar!
Hörmətli cənab Prezident, Sizi Azərbaycanda bir daha salamlayıram. Sizə bir daha “Xoş gəlmisiniz!” deyirəm.
Bolqarıstan Respublikasının Prezidenti cənab Pırvanovun Azərbaycana rəsmi səfəri böyük əhəmiyyət kəsb edir. Biz bu səfəri çox səbirsizliklə gözləyirdik. Çox şadıq ki, bu səfər çox uğurlu keçir. Keçirdiyimiz danışıqlar bir daha onu göstərir ki, iki ölkə arasında olan münasibətlər inkişaf edir və əlaqələrimiz güclənir. Əminəm ki, bu səfərdən sonra siyasi, iqtisadi, mədəni və bütün digər sahələrdə əməkdaşlığımız daha da güclənəcəkdir.
Siyasi baxımdan ölkələrimiz bir-birinə çox yaxındır. Biz Avropa və Avratlantika strukturlarına uğurla inteqrasiya edirik və ikitərəfli münasibətlər də bu baxımdan çox müsbət istiqamətdə inkişaf edir. ATƏT-in sədri kimi, Bolqarıstan Ermənistan-Azərbaycan, Dağlıq Qarabağ münaqişəsinin nizama salınması işində çox fəal rol oynayır və biz çox məmnunuq ki, bu fəaliyyət nəticəsində danışıqlar prosesində yeni irəliləyiş müşahidə oluna bilər.
İqtisadi sahədə də böyük potensial var, lakin bu potensial hələlik tam gücü ilə işə salınmayıbdır. Amma ümid edirəm ki, bu səfərdən sonra ölkələrimiz arasında iqtisadi əlaqələr inkişaf edəcəkdir.
Hökumətlərarası birgə komissiyanın iclası keçirilmiş, işçi qrupunun yaradılması haqqında qərar qəbul edilmişdir. Ümid edirəm ki, Komissiyanın fəaliyyəti və eyni zamanda, bu gün Azərbaycana gəlmiş çoxsaylı Bolqarıstan biznesmenlərinin azərbaycanlı həmkarları ilə danışıqları nəticəsində iqtisadi sahədə də böyük uğurlar əldə edə biləcəyik.
Bolqarıstan və Azərbaycanın iqtisadiyyatı sürətlə və dinamik şəkildə inkişaf edir. Əlbəttə, iqtisadi potensial gücləndikcə bizə imkan verəcək ki, iki ölkə arasında iqtisadi əlaqələr daha da sürətlənsin və hər iki tərəfə böyük fayda gətirsin. Ümid edirəm, yaxın zamanlarda Azərbaycanın Bolqarıstanda açılacaq səfirliyinin fəaliyyəti də ümumi işimizə böyük töhfə verəcəkdir.
Qeyd etmək istəyirəm ki, bizim həm təkbətək, həm də geniş tərkibdə danışıqlarımız çox səmimi şəraitdə keçmişdir. Biz çox geniş əhatəli məsələləri müzakirə etdik. İkitərəfli münasibətləri, regional əməkdaşlıq məsələlərini müzakirə etdik və əlbəttə, Ermənistan-Azərbaycan, Dağlıq Qarabağ münaqişəsi haqqında fikir mübadiləsi apardıq. Mən çox şadam ki, aramızda yaranmış gözəl münasibət, bu səmimiyyət bizə imkan verəcək ki, ölkələrimizin münasibətlərini yeni pilləyə qaldıraq.
Hörmətli cənab Prezident, Sizi Azərbaycanda bir daha salamlayıram. Əminəm ki, çox uğurla başlanmış bu səfər uğurla da davam edəcəkdir. Sizin səfərinizin nəticəsində iki ölkə bir-birinə daha da yaxın olacaqdır.
Bölmənin digər xəbərləri
