AZƏRBAYCAN RESPUBLİKASI BAŞ PROKURORLUĞUMƏTBUAT XİDMƏTİNİN MƏLUMATI

07.10.2003 [21:41]
Çap et
A⁺ A^-

Bərdə rayon Hərbi Komissarlığı tərəfindən bu il iyulun 14-də həqiqi hərbi xidmətə çağırılmış Ağayev Rəvan Musa oğlu N saylı hərbi hissədə qulluqda olarkən, oktyabrın 4-də hərbi hissə komandanlığının əmrinə əsasən Pirəküşkül qəsəbəsi yaxınlığındakı hərbi hissənin qum karxanasında çınqıl toplamaq məqsədi ilə hərbi qulluqçular tərəfindən qazıntı işləri apararkən, iki metr hündürlüyü olan təpəciyin altında yerləşən çınqıl qatı uçaraq əsgər R.M.Ağayevi yaxınlıqda saxlanılmış ZİL-131 markalı avtomaşının arxa yük yerinin açıq olan qapısına sıxmış, orada olan hərbçilər tərəfindən köməklik göstərilərək oradan çıxarılmış, hərbi hissəyə aparılmış, hissədə özünü pis hiss etdiyinə görə tibb məntəqəsinə göndərilmiş, sonra isə hərbi hospitala aparılan zaman yolda ölmüşdür.

R.Ağayevin ölüm faktı ilə əlaqədar oktyabrın 6-da Sumqayıt hərbi prokurorluğu tərəfindən Azərbaycan Respublikası Cinayət Məcəlləsinin ağır nəticələrə səbəb olan qulluğa səhlənkar yanaşmanı nəzərdə tutan 342.2-ci maddəsi ilə cinayət işi başlanmışdır.

R.Ağayevin ölümünün səbəblərinin və təhlükəsizlik texnikası qaydalarına riayət olunmasını təmin etməli şəxslərin müəyyən edilməsi məqsədi ilə müvafiq ekspertizalar təyin edilmiş, nəticəsindən asılı olaraq cavabdeh şəxslərin əməlinə hüquqi qiymət veriləcəkdir.

Rəvan Ağayevin ölümü barədə məlumat alaraq narahatçılıq hissi keçirən valideynləri və digər qohumları oktyabrın 5-də saat 9.30 radələrində Bərdə rayon Hərbi Komissarlığına gələrək ictimai qaydanı kobud şəkildə pozmuş, hərbi komissarlığın normal fəaliyyətinə mane olmuşdur. Göstərilən hal üzrə araşdırma aparılır.

Hər iki fakt Baş Prokurorluğun nəzarətində olmaqla qanuni tədbir görülməsi təmin ediləcəkdir.