Noyabrın 4-də ölkəmizin Ukraynadakı səfirliyində Azərbaycan Respublikası ilə Moldova Respublikası arasında dostluq və əməkdaşlıq haqqında 1998-ci ildə Bakıda imzalanmış müqavilə barədə ratifikasiya sənədlərinin mübadiləsinə dair protokolun imzalanması mərasimi olmuşdur. Protokolu Azərbaycan hökuməti adından ölkəmizin Moldova Respublikasındakı səfiri Tələt Əliyev, Moldova tərəfindən bu ölkənin Ukraynadakı səfiri Nikolae Çernomaz imzalamışlar.

Moldova diplomatı AZƏRTAC-ın müxbiri ilə söhbətində İlham Əliyevin Azərbaycan Respublikasının Prezidenti vəzifəsinə başlaması münasibətilə xalqımızı səmimiyyətlə və ürəkdən təbrik etdi və Moldova-Azərbaycan münasibətlərinin bütün sahələrdə gözəl perspektivinə qəti əmin olduğunu bildirdi.