AZƏRBAYCAN RESPUBLİKASININ OMBUDSMANI NEFTÇALADA İCTİMAİ DİNLƏMƏLƏR KEÇİRMİŞDİR
AZƏRTAC-ın müxbiri xəbər verir ki, Azərbaycan Respublikasının insan hüquqları üzrə müvəkkili (ombudsman) Elmira Süleymanova avqustun 1-də Neftçalada İnsan hüquqlarının müdafiəsi üzrə Milli Fəaliyyət Planının təbliği və tətbiqi vəziyyəti ilə bağlı ictimai dinləmələr keçirmişdir.
Yığıncaqda 61 saylı Neftçala seçki dairəsi dairə seçki komissiyasının sədri, hüquq mühafizə orqanlarının, bələdiyyələrin, şəhər, qəsəbə və kənd inzibati ərazi nümayəndəliklərinin, qeyri-hökumət təşkilatlarının rəhbərləri iştirak etmişlər.
Əvvəlcə “İnsan Hüquqlarının Müdafiəsi üzrə Milli Fəaliyyət Planı”nın təbliği və tətbiqi üzrə rayonda görülən işlər haqqında icra hakimiyyəti başçısının birinci müavini Dilavər Əliyevin məlumatı dinlənilmişdir.
İnsan hüquqları üzrə müvəkkili Elmira Süleymanova və çıxış edən natiqlər bildirmişlər ki, rayonda insan hüquq və azadlıqlarının təmin olunması ilə əlaqədar ardıcıl tədbirlər həyata keçirilir, vətəndaşların müraciətlərinə obyektiv münasibət bəslənir. Belə bir fikir xüsusi vurğulanmışdır ki, rayon seçiciləri qarşıdakı prezident seçkilərinin şəffaf və demokratiya şəraitində keçməsi üçün səylərini əsirgəməyəcəklər.
Bölmənin digər xəbərləri
