AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB İLHAM ƏLİYEVƏ
Sizi tarixi bir hadisə - Azərbaycan Respublikasının Prezidenti İlham Əliyevin andiçmə mərasimi münasibətilə salamlamaq Gürcüstanın Prezidenti və vətəndaşı kimi mənim üçün çox böyük sevincdir. Bu hadisə təkcə ona görə tarixi deyildir ki, qardaş Azərbaycan xalqı sabitliyin və tərəqqinin xeyrinə olaraq öz strateji seçimini etmişdir, həm də ona görə tarixidir ki, regionun əsas dövləti kamillik imtahanından növbəti dəfə şərəflə çıxdı.
Çox hörmətli İlham Heydər oğlu, bu gündən etibarən Siz özünün siyasi xətti ilə Azərbaycanı Avrasiyanın mühüm ölkəsinə çevirmiş, dövlətinizin beynəlxalq aləmdə nüfuz və hörmətini yüksəklərə qaldırmış, ölkəni Avropa və Avratlantika təhlükəsizlik strukturlarına inteqrasiyanın dönməz islahatlar yoluna istiqamətləndirmiş görkəmli siyasətçi, müdrik, cəsarətli insan olan Heydər Əliyevin siyasi xəttini davam etdirmək üçün öz üzərinizə olduqca böyük məsuliyyət götürürsünüz. Heydər Əliyevin seçdiyi xətt regionun olduqca zəngin təbii sərvətlərinin Azərbaycan xalqına, bütün dünyaya xidmətə yönəldilməsini mümkün etmiş, Avropanın cənub-şərq hissəsi olan Qafqazın funksiyasını keyfiyyətcə yeni səviyyəyə qaldırmışdır. Çox hörmətli İlham Heydər oğlu, bu, ağır və çətin yükdür və onu Sizin atanız kimi layiqincə daşımaq hər adamın işi deyildir. Bundan ötrü böyük hünər gərəkdir və mən ürəkdən şadam ki, Sizdə xarakterin bu cəhətini də görürəm. Zənn edirəm ki, o, Sizə irsən keçmişdir.
Görkəmli xadim və böyük insan olan Prezident Heydər Əliyev ilə qardaşlıq münasibətlərimizlə həmişə fəxr etmişəm və bu gün də fəxr edirəm. Xalqlarımızın çoxəsrlik ənənələrinə arxalanaraq, məhz aramızdakı tam qarşılıqlı anlaşma sayəsində biz dövlətlərimiz üçün çətin olan illərdə ölkələrimiz arasında gələcək qarşılıqlı münasibətlərin və əbədi dostluğun misilsiz, möhkəm bünövrəsini qoymağa müvəffəq olmuşuq. Mən o illəri əbəs yerə xatırlamadım. O vaxtlar dövlətlərimizin, eləcə də Qara dəniz və Xəzər dənizi regionundakı bir çox ölkələrin gələcəyi olduqca və son dərəcə dumanlı idi. Dövlətlərimizin həqiqi müstəqilliyinə nail olmaq üçün gördüyümüz işlər heç də hamının ürəyincə deyildi. Bəzən biz heç də xeyirxah olmayan qüvvələrin şiddətli müqavimətini qırmaq məcburiyyətində qalırdıq. Lakin bu nadir dostluq və qarşılıqlı yardım sayəsində biz nəinki dövlətlərimizi dirçəltməyə, həm də qlobal layihələrin həyata keçirilməsinə başlamağa müvəffəq olduq.
Prezident Heydər Əliyevin qəbul etdiyi tarixi qərar ilkin Azərbaycan neftinin Supsa terminalı vasitəsilə dünya bazarlarına nəql olunmasına gətirib çıxardı və indi bu magistral artıq neçə illərdir fasiləsiz işləyir. Bakı-Tbilisi-Ceyhan əsas ixrac neft kəməri və Bakı-Tbilisi-Ərzurum qaz kəməri ilə əlaqədar hər cür şəkk-şübhələr və hətta spekulyasiyalar da az olmadı, lakin bütün bunlara baxmayaraq, hər iki kəmər artıq çəkilməkdədir və biz onların 2005-ci ilə istifadəyə veriləcəyini gözləyirik.
Bu gün, Azərbaycan xalqının öz seçimini etdiyi bir vaxtda mən belə bir fikirdəyəm ki, Sizin böyük siyasət meydanına çıxmağınız tamamilə qanunauyğundur. Mən sadəcə olaraq, belə düşünmürəm, əksinə, əminəm ki, Siz Azərbaycanın tərəqqiyə və firavanlığa doğru aparılmasını layiqincə davam etdirəcək, ölkənin görkəmli lideri olacaqsınız. Əziz İlham Heydər oğlu, öz tərəfimdən Sizə vəd etmək istəyirəm ki, aramızdakı çoxəsrlik münasibətlərin ildən-ilə dərinləşməsi üçün Gürcüstan hökuməti, gürcü xalqı və şəxsən mən bütün işləri görəcəyik. Gürcüstan həmişə - sevincdə də, kədərdə də Azərbaycanın sadiq müttəfiqi, etibarlı tərəfdaşı və dayağı olmuşdur, bu gün də belədir və bundan sonra da belə olacaqdır. Doğma qardaş kimi bizə həmişə bel bağlaya bilərsiniz. Elə bir qardaş ki, digər qardaşa kömək etmək onun üçün təkcə borc deyil, həm də böyük xoşbəxtlikdir.
Bizi qarşıda böyük işlər gözləyir, bizim planlarımız da birdir, niyyətlərimiz də birdir. Biz bütün müvəqqəti çətinlikləri dəf edəcək və ölkələrimizi güclü, çiçəklənən dövlətlərə çevirəcəyik.
Mən Sizi Azərbaycan Prezidenti vəzifəsinə seçilməyiniz münasibətilə təbrik edirəm. İndən belə Siz Xalqın Nümayəndəsi adının daşıyıcısısınız və bilirəm ki, Siz bu adı hər yerdə və həmişə iftixarla və şərəflə daşıyacaqsınız. Sizə və Sizin sevimli Azərbaycanınıza sülh və firavanlıq arzulayıram.
Eduard Şevardnadze,
Gürcüstanın Prezidenti
Tbilisi, 15 oktyabr 2003-cü il.
Bölmənin digər xəbərləri
