“Azərbaycan Tələbə Kartı”nın mobil tətbiqetməsi istifadəyə verilib
Bakı, 7 aprel, AZƏRTAC
Azərbaycan Tələbə Gənclər Təşkilatları İttifaqının (ATGTİ) təşəbbüsü ilə “Azərbaycan Tələbə Kartı”nın mobil tətbiqetməsi istifadəyə verilib.
ATGTİ-dən AZƏRTAC-a bildiriblər ki, mobil tətbiqetmə Gənclər və İdman Nazirliyinin dəstəyi ilə istifadəyə verilib. Bu yenilik sayəsində kartın sahibləri istifadəçi adı kimi şəxsiyyət vəsiqəsinin nömrəsini, şifrə olaraq isə fərdi identifikasiya nömrəsini (FIN kod) daxil edə bilərlər. Tələbələr tətbiqetmə vasitəsilə Azərbaycan Tələbə Kartı haqqında ətraflı məlumat əldə edib, istifadə qaydaları ilə tanış ola bilərlər.
Həmçinin tələbələr endirim əldə edə biləcəkləri məkanların siyahısını, orada mövcud olan endirim faizlərini daha rahat şəkildə öyrənib, təqdim edilən xəritədən istədikləri məkana marşrutu seçə bilər və yaxın ərazidə endirimlər barədə məlumat ala bilərlər.
Mobil tətbiqetmə vasitəsilə istifadəçilər SMS ilə “Azərbaycan Tələbə Kartı”na yeni qoşulmuş məkanlar haqqında yenilənmiş məlumatları və hansı məkanlarda bu və ya digər günlərdə aksiyalar və daha çox endirimlər təklif olunduğunu öyrənə biləcəklər.
“Azərbaycan Tələbə Kartı” sahibinə Avropanın 37 ölkəsində 80 mindən artıq, ölkəmizdə isə 300-dən çox obyektdə 5-55 faiz endirimlər təklif edil. Endirimlərdən səyahət zamanı, mağazalarda, iaşə obyektlərində və digər xidmətlər (sığorta, abunə servisi, bələdçi) üzrə yararlanmaq olar.
Bölmənin digər xəbərləri
