AZƏRBAYCAN TİBB UNİVERSİTETİ DAHA 28 TƏLƏBƏSİNİ İSTANBUL UNİVERSİTETİNƏ GÖNDƏRMİŞDİR

03.10.2003 [17:15]
Çap et
A⁺ A^-

Türkiyə Cümhuriyyətinin universitetləri ilə Azərbaycan Tibb Universiteti (ATU) arasında 1992-ci ildə imzalanmış əməkdaşlıq haqqında müqaviləyə uyğun olaraq, ATU-nun 10 tələbəsi həmin il İstanbul Universitetinə göndərilmiş, ali tibb təhsillərini və diplomdan sonrakı hazırlıqlarını orada başa vurmuşlar. Hazırda onlar ölkəmizin aparıcı klinikalarında fəaliyyət göstərirlər.

Səhiyyə Nazirliyindən AZƏRTAC-a bildirmişlər ki, ali tibb təhsili müəssisələrində aparılan islahatlara və göstərilən müqaviləyə uyğun olaraq, Azərbaycan Tibb Universiteti beynəlxalq əlaqələrini genişləndirməkdə davam edir. 2002-2003-cü tədris ilində müstəqil ölkəmizin bu ali tibb təhsili müəssisəsinin II-IV kurslarında təhsil alan daha 28 tələbəsi İstanbul Universitetinə göndərilmişdir. Onlardan 23 nəfəri həmin universitetin tibb, 3 nəfəri diş həkimliyi, 2 nəfəri isə əczaçılıq fakültələrində təhsillərini davam etdirəcəklər. Tələbələr Türkiyədə təhsil aldıqları müddətdə Azərbaycan dövləti tərəfindən təqaüdlə təmin olunacaq, onların yaşayış və təhsil xərclərini isə İstanbul Universiteti ödəyəcəkdir.

Tələbələrimiz 2003-cü il oktyabrın 1-dən İstanbul Universitetində tədrisə başlamışlar.