Azərbaycan-Ukrayna münasibətləri çoxşaxəli strateji tərəfdaşlıq mərhələsindədir ŞƏRH
Bakı, 28 aprel, AZƏRTAC
Ukrayna Prezidenti Volodimir Zelenskinin Azərbaycana səfəri Bakı–Kiyev münasibətlərinin çoxşaxəli və dərin mahiyyətini bir daha nümayiş etdirdi. Bu səfər təkcə diplomatik protokol çərçivəsində baş tutan görüşlərlə məhdudlaşmır, həm də iki ölkə arasında uzun illərə söykənən strateji tərəfdaşlığın yeni mərhələsini formalaşdıran mühüm siyasi hadisə kimi qiymətləndirilir. Mövcud reallıqlar fonunda bu səfər həm regional, həm də beynəlxalq kontekstdə diqqətlə təhlil olunur və onun nəticələri yalnız bugünkü deyil, gələcək əməkdaşlıq perspektivlərini də müəyyənləşdirir.
Bu sözləri AZƏRTAC-a açıqlamasında Qərbi Azərbaycan İcmasının Binəqədi rayon nümayəndəsi, pedaqogika üzrə elmlər doktoru Həsən Bayramov deyib.
O bildirib ki, ölkələrimiz və xalqlarımız arasında mövcud olan münasibətlərin mahiyyəti həmişə dostluq və əməkdaşlıq xüsusiyyəti daşıyıb. Hər iki ölkə daim bir-birinin ərazi bütövlüyünü dəstəkləyib. Bu istiqamətdə addımlar atılıb, beynəlxalq təşkilatlarda eyni mövqedən çıxış ediblər. Səfər çərçivəsində keçirilən görüşlərdə qarşılıqlı hörmət və anlayış ön planda oldu. Liderlərin çıxışlarında diqqət çəkən əsas məqam isə onların sülh və dialoq çağırışları idi.
Həsən Bayramov qeyd edib ki, ümumiyyətlə, Azərbaycan ilə Ukrayna arasında münasibətlər təsadüfi xarakter daşımır. Bu əlaqələr konkret hüquqi-siyasi baza üzərində qurulub. Hələ 2008-ci ildə Kiyevdə imzalanmış dostluq və strateji tərəfdaşlıq haqqında birgə bəyannamə iki ölkə arasında münasibətlərin istiqamətini müəyyən edən əsas sənəd kimi çıxış edir. Prezident İlham Əliyevin həyata keçirdiyi ardıcıl xarici siyasət kursu nəticəsində bu münasibətlər illər ərzində inkişaf edərək daha da möhkəmlənib. Volodimir Zelenskinin səfəri də məhz bu davamlı xəttin növbəti mərhələsi kimi çıxış edir və göstərir ki, Bakı ilə Kiyev arasında əməkdaşlıq qısamüddətli siyasi proseslərdən asılı deyil, uzunmüddətli strateji maraqlara əsaslanır.
Onun sözlərinə görə, Prezident İlham Əliyevin bəyanatı göstərir ki, Azərbaycan-Ukrayna münasibətləri yalnız dostluq səviyyəsində deyil, dövlət maraqlarına xidmət edən çoxşaxəli strateji tərəfdaşlıq mərhələsindədir.
Bölmənin digər xəbərləri
