Sentyabrın 1-də Nabranda Azərbaycan Respublikasının və Rusiya Federasiyası Dağıstan Respublikasının Daxili İşlər nazirlərinin iştirakı ilə əməliyyat və içtimai təhlükəsizlik xidmətləri rəhbərlərinin sərhədyanı əməkdaşlıq məsələlərinə dair müşavirəsi keçirilmişdir.

        Azərbaycan Respublikası və Rusiya Federasiyası Daxili İşlər Nazirlikləri, həmçinin hər iki dövlətin sərhədyanı bölgələrinin daxili işlər orqanları arasında əməkdaşlığa dair əldə edilmiş razılaşmalara uyğun olaraq, keçirilən həmin müşavirəni giriş sözü ilə Azərbaycan Respublikasının Daxili İşlər naziri, general-leytenant Ramil Usubov açdı. O, qonaqları səmimi salamladıqdan sonra “ölkəmizin şimali-qərb bölgəsində kriminogen durum, sərhədyanı zonada beynəlxalq terrorizmə, narkotiklərin qanunsuz dövriyyəsinə qarşı mübarizədə Azərbaycanın və Dağıstanın Daxili İşlər orqanlarının qarşılıqlı fəaliyyətinin vəziyyəti” barədə ətraflı məlumat verdi.

        Nazir belə görüşlərin hər iki tərəf üçün böyük əhəmiyyət kəsb etdiyini vurğuladı,qonşu ölkə ilə bütün sahələrdə, o cümlədən cinayətkarlıqla mübarizə sahəsində faydalı əməkdaşlığın getdikcə dərinləşməsindən məmnun olduğunu bildirdi. Ölkəmizdə sabitliyin yardılması və qorunması, cinayətkarlıqla qətiyyətli mübarizə aparılması, uğurlu hüquq-mühafizə siyasətinin həyata keçirilməsinə Azərbaycan Respublikasının Prezidenti cənab Heydər Əliyevin xüsusi diqqət yetirdiyini yüksək qiymətləndirdi. O, dedi ki, iki qonşu dövlətin daxili işlər orqanlarının sıx əməkdaşlığı Azərbaycan Prezidenti cənab Heydər Əliyevin və Rusiya Prezidenti cənab Vladimir Putinin ölkələrimiz arasında səmimi dostluq və mehriban qonşuluq münasibətləri yaradılmasına yönəldilmiş siyasəti sayəsində daha da möhkəmlənir və inkişaf edir.

Azərbaycan Respublikasının daxili işlər naziri ölkəmizdəki kriminogen durum, son illər ərzində cinayətkarlığa qarşı aparılan qətiyyətli mübarizə, ötən il dekabrın əvvəllərində “Sərhəd-sipər” şərti adı altında iki ölkənin daxili işlər orqanları əməkdaşlarının həyata keçirdikləri tədbirlərin uğurlu yekunları barədə dəətraflı məlumat verərək dedi ki, axtarışda olan 19 cinayətkar həbs edilmiş, xeyli miqdarda silah-sursat yığılmışdır. Qeyd olundu ki, Azərbaycanın Rusiya ilə sərhəd bölgələrində operativ vəziyyət tam nəzarət altındadır.

Sonra müşavirədə Dağıstan Respublikasının daxili işlər naziri, general-leytenant Adilqerey Maqomedtaqirov “İctimai təhlükəsizliyin təmin edilməsində Azərbaycanın və Dağıstanın sərhədyanı regional daxili işlər orqanlarının  qarşılıqlı fəaliyyətinin vəziyyəti haqqında” məlumat verdi.

Müşavirə iştirakçıları sərhəd bölgələrində cinayətkarlıqla mübarizənin vəziyyətini müzakirə edərək, terrorizm, separatizm və dini ekstremizmlə, mütəşəkkil cinayətkarlıqla, iqtisadi sahədə cinayətkarlıqla mübarizə, nəqliyyatda təhlükəsizliyin təmin edilməsi məsələlərinə diqqət yetirdilər. Sərhədyanı ərazidəki daxili işlər orqanları arasında əməkdaşlığın və qarşılıqlı yardımın vəziyyətini təhlil etdilər.

Müşavirədə qonşu ölkələrin sərhədyanı bölgələri daxili işlər orqanlarının əməkdaşlığının dinamik, konstruktiv inkişafı, mövcud normativ-hüquqi baza çərçivəsində cinayətkarlıqla birgə mübarizədəəldə olunan müsbət nəticələr, bu mübarizənin perspektivləri xüsusi vurğulandı.

Tədbirdə həmçinin dəmiryolu nəqliyyatında, ilk növbədə Qafqaz avtomagistralında və yollarda təhlükəsizliyin təmin edilməsində birgə səylərin, sərhədyanı ərazidə cinayətkar fəaliyyətlə məşğul olan, yaxud onlarla bağlı şəxslər və təşkilatlar haqqında informasiyalar da daxil olmaqla birgə məlumatlar bankının yaradılması istiqamətində işlərin gücləndirilməsinin vacibliyi nəzərə çarpdırıldı.

Tərəflər operativ informasiya və statistik göstəricilərin mübadiləsini genişləndirməyin, əlaqələndirilmiş əməliyyat-axtarış vəəməliyyat-profilaktiki tədbirlərin əhəmiyyətini vurğuladılar. Qarşı tərəfdən yardım haqqında verilən sorğuların yerinə yetirilməsi üzrə nəzarəti gücləndirməyin, terrorizm, mütəşəkkil cinayətkarlıq, qanunsuz silah və narkotik vasitələrin dövriyyəsinə, nəqliyyatda cinayətlərə qarşı mübarizədə birgə tədbirlərin həyata keçirilməsinin zəruri olduğu bir daha nəzərə çarpdırıldı.

        Müşavirədə Azərbaycan Respublikası və Rusiya Federasiyasının Dağıstan Respublikası daxili işlər orqanları arasında əməkdaşlığın daha da inkişaf etdirilməsi barədə protokol imzalandı.

        Protokolu Azərbaycan Respublikasının daxili işlər naziri, general-leytenant Ramil Usubov və Rusiya Federasiyasının Dağıstan Respublikası daxili işlər naziri general-leytenant Adilqerey Maqomedtaqirov imzaladılar.

        Azərbaycanın daxili işlər naziri Ramil Usubov ölkəmizin və Dağıstanın daxili işlər orqanları arasında əməkdaşlığın möhkəmləndirilməsində, mütəşəkkil cinayətkarlığa qarşı mübarizədə, transmilli cinayətkar qrupların zərərsizləşdirilməsində və ictimai təhlükəsizliyin təmin edilməsində xüsusi xidmətlərinə görə Dağıstan Respublikasının daxili işlər naziri Adilqerey Maqomedtaqirova xatirə hədiyyəsi təqdim etdi.