Avropada qazın qiyməti son 3 ilin maksimumuna yüksəlib
Bakı, 9 sentyabr, AZƏRTAC
Avropada təbii qaz fyuçersləri üzrə müqavilələrin qiyməti ötən həftənin sonundan bəri 8 faizdən çox artaraq 2023-cü ilin yanvar ayından indiyədək ən yüksək səviyyəyə çatıb.
AZƏRTAC xarici mediaya istinadla xəbər verir ki, Niderlandın TTF habında qazın qiyməti 2,8 faiz artaraq meqavat-saat üçün 78,67 avroya çatıb. Bu səviyyə davam edərsə, bağlanış qiyməti 2022-ci ilin dekabr ayından bəri ən yüksək göstəriciyə çatacaq.
Ekspertlərin fikrincə, Körfəzdə gərginliyin artması ilə Avropada təbii qaz qiymətləri ardıcıl dördüncü sessiyadır ki, yüksəlir. Bu da ehtiyatların az olması səbəbindən qarşıdakı aylarda qlobal tədarüklə bağlı narahatlıqlar yaradır. İxracda davam edən fasilələr qlobal bazarı gərginləşdirib və Avropa qışdan əvvəl qaz anbarlarını doldurmaqda çətinlik çəkir.
Avropadakı anbarlar cəmi 67 faiz doludur ki, bu da beşillik orta göstərici olan 84 faizdən xeyli aşağıdır. Treyderlər isə istilik mövsümü başlayana kimi Asiya və digər bölgələrdəki alıcılarla qaz tədarükü üçün rəqabət riski ilə üzləşirlər.
Avropanın ən böyük enerji bazarı olan Almaniyada vəziyyət daha da ciddidir və burada anbarlar cəmi 55 faiz doludur. Almaniyanın İqtisadiyyat Nazirliyi ölkədəki 4 anbarın demək olar ki, boş olduğunu və istilik mövsümü başlamazdan əvvəl doluluq hədəflərinə çatmağın texniki cəhətdən mümkün olmadığını bildirib.
Bölmənin digər xəbərləri
