Saida Safayeva: Dayanıqlı İnkişaf Məqsədlərinin təqdim etdiyi icra çərçivəsini lazımi səviyyədə tətbiq etmirik
Bakı, 9 sentyabr, AZƏRTAC
AZƏRTAC xəbər verir ki, bunu Özbəkistanda Dayanıqlı İnkişaf Mərkəzinin rəhbəri Saida Safayeva “Bakı İqlim Fəaliyyəti Həftəsi 2026” (BCAW2026) çərçivəsində Nizami Gəncəvi Beynəlxalq Mərkəzinin təşkilatçılığı ilə keçirilən "COP31-dən sonra iqlim liderliyi: Tərəfdaşlıq vasitəsilə icranın təmin edilməsi" mövzusunda dəyirmi masada çıxış edərkən deyib.
"Vurğulamaq istədiyim əsas çətinliklərdən biri təkcə mənim regionumla deyil, bütün dünya ilə bağlıdır. Düşünürəm ki, burada çox nikbin danışmayacağam. Məncə, 2030-cu ilə qədər biz bu hədəflərin bir qisminə yenə nail ola bilməyəcəyik. Dayanıqlı İnkişaf Məqsədləri çərçivəsində enerji təhlükəsizliyi, ərzaq təhlükəsizliyi, insan inkişafı, eləcə də su təhlükəsizliyi kimi məsələlər bir-biri ilə o qədər sıx bağlıdır ki, artıq onları ayrı-ayrılıqda nəzərdən keçirmək mümkün deyil. Lakin biz Dayanıqlı İnkişaf Məqsədlərinin təqdim etdiyi bu icra çərçivəsini lazımi səviyyədə tətbiq etmirik. Burada çoxsaylı nüfuzlu və hörmətli təşkilatların nümayəndələri iştirak edir. Mən təklif etmək istərdim ki, bu həftənin sonuna qədər Dayanıqlı İnkişaf Məqsədlərinin 17-ci məqsədində nəzərdə tutulan tərəfdaşlıq və öhdəliklər barədə müzakirə aparaq. Bizə həqiqətən də praktik və konkret fəaliyyət addımları lazımdır. Çoxlu öhdəliklər var, amma nə mənim regionumda, nə də ümumilikdə dünyada bunları birləşdirən, inteqrasiya olunmuş fəaliyyət görmürük. Məhz buna görə də biz dəfələrlə eyni uğursuzluğu yaşayırıq", - deyə Saida Safayeva bildirib.
Bölmənin digər xəbərləri
