AZƏRBAYCANDA ATATÜRK MƏRKƏZİNİN NÖVBƏTİ BÜLLETENİ ÇAPDAN ÇIXMIŞDIR
AZƏRTAC xəbər verir ki, Azərbaycanda Atatürk Mərkəzinin (AzAtaM) rəsmi orqanı olan rüblük bülletenin növbəti 4-cü (24) nömrəsi çapdan çıxmışdır.
Bülletendə ötən ilin noyabrında Bakıda keçirilmiş Türk Dövlət və Cəmiyyətlərinin XI Dostluq, Qardaşlıq və Əməkdaşlıq Qurultayı, tədbirdə Azərbaycan Prezidenti İlham Əliyevin, Türkiyənin Baş naziri Rəcəb Tayyib Ərdoğanın və Şimali Kipr türklərinin lideri Mehmet Əli Tələtin nitqləri öz əksini tapmışdır.
Nəşrdə AzAtaM-ın rəhbəri, Milli Məclisin mədəniyyət məsələləri daimi komissiyasının sədri, AMEA-nın müxbir üzvü Nizami Cəfərovun “Bizim əsas məqsədimiz türk xalqlarının vahid dil və əlifbasının olmasıdır” sərlövhəli müsahibəsi, texnika elmləri namizədi Arif Əliyevin “Parfiya imperiyası” yazısı, “Osmanlı sultanları” rubrikasında mərkəzin rəhbərinin müavini Osman Musayevin Orxan Qazi (1281-1362) və sultan Murad Xudavəndiyar (1326-1389) barədə materialları və s. dərc olunmuşdur.
Topluda AzAtaM-da keçirilmiş tədbir və görüşlər, yeni kitab və nəşrlər haqqında, həmçinin Türkiyə mətbuatında Azərbaycan mədəniyyəti və incəsənəti ilə bağlı dərc edilmiş məqalələr barədə məlumatlar da verilmişdir.
Bölmənin digər xəbərləri
