CƏMİYYƏT
Azərbaycanda daha bir nadir cərrahiyyə əməliyyatı aparılıb
Bakı, 16 iyul (AZƏRTAC). Səhiyyə Nazirliyinin Mərkəzi Neftçilər Xəstəxanasında ölkəmizdə ilk dəfə daha bir nadir cərrahiyyə əməliyyatı icra edilib.
AZƏRTAC xəbər verir ki, “ağciyər törəməsi” diaqnozu ilə xəstəxanaya müraciət edən 56 yaşlı pasiyent Mirim Əsədovun üzərində ağciyərin bir payının endoskopik yolla çıxarılması əməliyyatı aparılıb. Xəstənin ağciyərinin alt hissəsindəki törəmə götürüldükdən sonra ətraf limfa düyünləri də təmizlənib.
Həkimlər bildiriblər ki, klassik cərrahiyyə üsulu ilə xəstənin döş qəfəsi 15-20 santimetr açılaraq 5-6 saat ərzində əməliyyat aparılırdı. Endoskopik yolla aparılan cərrahiyyə əməliyyatında isə xəstənin döş qəfəsi açılmır və xəstə 5-6 ay ərzində yaranın sağalmasından əziyyət çəkmir.
Dörd saatdan artıq davam edən əməliyyat yerli mütəxəssislərin iştirakı ilə aparılıb.