AZƏRBAYCANDA QARA DƏNİZ TİCARƏT VƏ İNKİŞAF BANKININ TƏQDİMATI
Oktyabrın 30-da “Həyat recensi-Naxçıvan” mehmanxanasında Azərbaycanda Qara dəniz Ticarət və İnkişaf Bankının (QTİB) təqdimat mərasimi keçirilmişdir. Bank 1998-ci ildə, Qara Dəniz İqtisadi Əməkdaşlıq Təşkilatının (QİƏT) üzvü olan 11 dövlət tərəfindən regional maliyyə qurumu kimi təsis edilmişdir.
Mərasimdə bildirildi ki, bankın məqsədi QİƏT ölkələrinin iqtisadi inkişafını sürətləndirmək və onların arasında əməkdaşlığı təşviq etməkdir. Bank regionda ticarətin inkişafına və layihələrin həyata keçirilməsinə kömək göstərəcəkdir.
Üzv ölkələrin QTİB-in nizamnamə kapitalında iştirak payları aşağıdakı kimidir: Yunanıstan, Rusiya, Türkiyə - hərəsi 16,5 faiz, Bolqarıstan, Rumıniya və Ukrayna - hərəsi 13,5 faiz, Albaniya, Azərbaycan, Gürcüstan, Moldova və Ermənistan - hərəsi 2 faiz. Bankın nizamnamə kapitalı təxminən 1,3 milyard ABŞ dollarıdır.
Bankın fəaliyyəti onun təsis edilməsi haqqında Birləşmiş Millətlər Təşkilatında qeydiyyatdan keçirilmiş müqavilə ilə tənzimlənir.
Üzv ölkələrin iqtisadi inkişafın müxtəlif mərhələlərində olması və qarşılarında müxtəlif vəzifələr durması ilə əlaqədar QTİB hər dövlətə onun tələbatından asılı olaraq, fərdi qaydada yanaşır və sıx əməkdaşlıq şəraitində onların hər biri üçün ayrıca strategiya hazırlayır.
Bölmənin digər xəbərləri
