CƏMİYYƏT
Azərbaycanda şəkərli diabet xəstələrinin müalicəsində pompalar tətbiq olunacaqdır
Bakı, 8 iyul (AZƏRTAC). Azərbaycanda ilk dəfə şəkərli diabetdən əziyyət çəkən uşaqlara insulinin vurulmasında xüsusi cihazlardan -pompalardan istifadə olunacaqdır.
Diabetli uşaqların müalicəsində əvəzsiz olan bu cihazlar Səhiyyə Nazirliyi tərəfindən dövlət hesabına alınaraq Respublika Endokrinoloji Mərkəzinə təqdim olunmuşdur.
Nazirliyin mətbuat xidmətindən AZƏRTAC-a bildirmişlər ki, ilkin mərhələdə diabetli uşaqlar üçün 90 ədəd pompa nəzərdə tutulmuşdur. Pompa vasitəsilə insulinin günün istənilən vaxtında vurulması, mütləq miqdarı kənardan proqramlaşdırılır. Verilən proqrama əsasən insulin bədənə yeridilir. Bu da orqanizmdə şəkəri daha düzgün kompensasiya etməyə imkan verir. Pompada ultraqısa və yaxud qısa təsirli insulin istifadə olunur.
Digər insulin yeridilmə metodunda (insulin preparatlarının infuziyasında) isə gündə 1-2 dəfə bazal insulin xəstənin yediyi qidaya uyğun 3-4 dəfə vurulur. Amma yeni metodda insulin iynəsi bir dəfə dəri altına yeridilir, şunur vasitəsilə pompayla əlaqələndirilir və üç gündən bir dəyişdirilir.