Azərbaycanda startapçılara səfər qrantlarının verilməsinə başlanılıb
Bakı, 4 oktyabr, AZƏRTAC
Oktyabrın 4-də "Fast Track" Akselerasiya Proqramı çərçivəsində ilk səfər qrantlarının təqdimat mərasimi keçirilib.
Nəqliyyat, Rabitə və Yüksək Texnologiyalar Nazirliyinin mətbuat xidmətindən AZƏRTAC-a bildiriblər ki, Yüksək Texnologiyalar Parkı (YTP) səfər qrantları verməyə başlayıb. Səfər qrantları Azərbaycan Respublikasında fəaliyyət göstərən startap layihələrinin yaradıcılarına xaricdə investisiyayönümlü beynəlxalq startap tədbirlərdə iştirak etmək, həmçinin xarici investorlarla görüşlər keçirmək üçün səfərlərin təşkil edilməsi məqsədilə verilir.
Səfər qrantı verilən layihələrdən biri "Ticketsetup" startapı olub. Bu layihə çərçivəsində yaradılmış sistemin köməyi ilə bilet satışını çox asanlıqla mərkəzləşmiş qaydada təşkil etmək mümkündür. Sistem biletin yaradılması, biletin satışı və həmçinin biletin yoxlanılması kimi bütün mərhələləri özündə birləşdirir.
Həmçinin satılmış biletlər haqqında müxtəlif hesabatların interaktiv idarəetmə panelindən əldə edilməsinə imkan verir.
İndiyədək Azərbaycanda "Ticketsetup" sistemi vasitəsilə 1.5 milyondan artıq bilet satışı həyata keçirilib.
Layihə rəhbəri qrant səfəri çərçivəsində Almaniyanın Köln şəhərində Avropanın ən iri startap tədbirlərindən biri hesab edilən "StartupCon" tədbirində və sərgidə iştirak edəcək, akselerasiya proqramlarına qoşulacaq.
Proqram çərçivəsində startapların beynəlxalq sərgisində iştirak etməklə yanaşı, sentyabrın 15-dən etibarən "RTZ Center Co-working" mərkəzində 3 ay müddətində pulsuz ofisdən istifadə etmək fürsəti əldə ediləcək. Əsas məqsədi məhsulu Avropa bazarına çıxarmaq və şirkətin rəsmiləşdirilməsi prosesini həyata keçirmək, yerli bazarı dərindən öyrənmək, həmçinin potensial müştərilərlə görüşmək olan layihə YTP tərəfindən verilən səfər qrantı sayəsində qarşıya qoyulan hədəfə daha da yaxınlaşmış olacaq.
Səfər qrantı verilən digər layihə isə "OnBrunch" layihəsi olub. Bu layihə hazırda ayrı-ayrı ictimai məkanların servislərinin virtual proyeksiyasını yaradır. Həmçinin "Onbranch"da məkanların menyuları, üçölçülü rezervasiya sistemi, onlayn satış, endirimlər və bu kimi məlumatları əldə etmək mümkündür.
Sözügedən layihə Türkiyənin İstanbul şəhərində keçiriləcək "Startup İstanbul Competition"a dəvət alıb.
Qeyd edək ki, "Startup İstanbul" dünyanın 135 ölkəsindən 25000 müraciət arasından seçilmiş 100 finalçının iştirak etdiyi startap yarışı olmaqla yanaşı, həm də nüfuzlu mentorların iştirakı ilə keçirilən forumdur.
Bölmənin digər xəbərləri
