AZƏRBAYCANIN AQRAR SEKTORUNDA YAPONİYA TƏCRÜBƏSİ TƏTBİQ EDİLƏCƏKDİR
Yaponiyanın Xokkaydo regionunda kənd təsərrüfatının bir sıra sahələri üzrə əldə olunmuş qabaqcıl təcrübə Azərbaycanda tətbiq ediləcəkdir. Bu məqsədlə hazırlanan pilot layihələrin torpaq və təbii iqlim şəraitində oxşarlıq olan ərazilərdə - Gəncə, Şəki, İsmayıllı və Quba rayonlarında həyata keçirilməsi nəzərdə tutulmuşdur.
Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyindən AZƏRTAC-a bildirmişlər ki, Yaponiya Beynəlxalq Əməkdaşlıq Bankı (JBİC) bu layihələri maliyyələşdirməyi öz öhdəsinə götürmüşdür. Həmin maliyyə qurumunun nümayəndələri bu günlərdə Bakının ərzaq məhsulları istehsal edən bir sıra emal müəssisələrində, habelə respublikamızın müxtəlif bölgələrindəki regional aqrar-elm mərkəzlərində olmuş, mütəxəssislərlə söhbətlər aparmışlar. İstehsal şəraitinin və mövcud potensialın ətraflı öyrənilməsi tərəflər arasında əməkdaşlığın istiqamətlərini müəyyən edəcəkdir.
Yaponiya Beynəlxalq Əməkdaşlıq Bankı nümayəndələrinin sentyabrda Azərbaycana daha bir səfəri gözlənilir. Həmin səfər zamanı onlar birgə fəaliyyət barədə öz təkliflərini Azərbaycan hökumətinə təqdim edəcəklər.
Bölmənin digər xəbərləri
