SİYASƏT
AZƏRBAYCANIN AŞPA-dakı NÜMAYƏNDƏ HEYƏTİNİN ÜZVLƏRİ İLƏ GÖRÜŞ
Avropa Şurası Nazirlər Komitəsinin sədri, Litvanın xarici işlər naziri Antanas Valionis və onu müşaiyət edən şəxslər aprelin 9-da Milli Məclisdə Azərbaycan Parlamentinin Avropa Şurası Parlament Assambleyasındakı nümayəndə heyətinin üzvləri ilə görüşmüşdür.
Milli Məclisin AŞPA-dakı nümayəndə heyətinin rəhbəri İlham Əliyev qonaqları səmimi salamlayaraq bildirdi ki, ölkəmizin bu mötəbər beynəlxalq təşkilatdakı təmsilçiləri Avropa Şurasının müxtəlif qurumlarının işində fəal iştirak edirlər. O, nümayəndə heyətinin üzvlərini qonaqlara təqdim edərək dedi ki, onların fəaliyyəti Avropa ölkələrinin nümayəndələri ilə daha sıx əməkadaşlığa, habelə Azərbaycanın beynəlxalq təşkilatlara daha da inteqrasiya olunmasına imkan yaradır.
Ilham Əliyev Avropa Şurası Nazirlər Komitəsinin sədrinə ölkəmizdəki demokratikləşmə prosesi, iqtisadi və siyasi sahələrdə əldə olunmuş nailiyyətlər barədə ətraflı məlumat verdi. O dedi ki, adambaşına sərmayə qoyuluşunun həcminə görə ölkəmizin keçmiş Sovet İttifaqı respublikaları arasında birinci yerdə olması faktı Azərbaycan rəhbərliyinin uğurlu siyasətinin göstəricisidir.
Antanas Valionis ətraflı məlumata görə İlham Əliyevə təşəkkürünü bildirərək vurğuladı ki, Avropa Şurası cəmiyyətin demokratikləşməsi sahəsində Azərbaycanın qazandığı nailiyyətləri dəfələrlə etiraf etmişdir. Avropa Şurası Nazirlər Komitəsinin sədri dedi:” Ölkəniz qanunvericiliyin Avropa standartlarına uyğunlaşdırılmasında böyük tərəqqiyə nail olmuşdur”.
Antanas Valionis səfərinin məqsədindən danışaraq bildirdi ki, onlar Azərbaycandakı vəziyyətlə yaxından tanış olmaq və ölkədə aparılan islahatlara texniki və hüquqi yardım göstərəcək Avropa Şurası ekspertlərinin işini maliyyələşdirmək niyyətindədirlər.
Ilham Əliyev Azərbaycanda gedən demokratikləşmə prosesini yüksək qiymətləndirdiyinə görə Antanas Valionisə təşəkkür edərək dedi ki, ölkəmiz Avropa Şurasına daxil olarkən üzərinə götürdüyü öhdəlikləri uğurla yerinə yetirmişdir. Bugünə kimi vaxtında yerinə yetirilməmiş heç bir bənd qalmamışdır. Həmin ödəliklərin yerinə yetirilməsi eyni zamanda Azərbaycanda demokratikləşmə prosesinin inkişafına kömək edir.
İlham Əliyev Azərbaycanın Avropa Şurasındakı üzvlüyünün böyük əhəmiyyətini vurğulayaraq ümidvar olduğunu bildirdi ki, ATƏT-lə yanaşı, bu təşkilat da Dağlıq Qarabağ münaqişəsinin nizama salınmasında fəal rol oynayacaqdır. O dedi ki, Azərbaycanın problemi sülh danışıqları yolu ilə həll etmək səylərinə baxmayaraq, Ermənistanın qeyri-konstruktiv mövqeyi nəticəsində bu, mümkün olmur. Uzun illərdir ki, bu problemlə ATƏT-in Minsk qrupu məşğul olur, lakin onun səyləri də nəticəsiz qalmışdır. Təəssüf ki, bu gün bəzi beynəlxalq təşkilatlar təcavüzkarla təcavüz qurbanını bir cərgəyə qoyurlar. İlham Əliyev bildirdi ki, hətta hərdən bəzi Avropa təşkilatlarının Ermənistanla iqtisadi əməkdaşlığa çağırışları da səslənir, lakin bu, yalnız ermənilərin işğal etdikləri Azərbaycan əraziləri azad edildikdən sonra mümkündür.
Sonra İlham Əliyev Litvanın Avropa Birliyinə qəbul edilmə ərəfəsində olması münasibətilə Antanas Valionisi təbrik edərək, Azərbaycan Avropa Şurasına daxil olarkən onu dəstəklədiyinə görə Litva rəhbərliyinə minnətdarlığını çatdırmağı xahiş etdi.
Azərbaycan Parlamentinin AŞPA-dakı nümayəndə heyətinin rəhbəri Avropa Şurasındakı bəzi siyasətçilərin uydurma siyasi məhbuslar problemindən istifadə edərək, ölkəmizə təzyiq göstərmək cəhdləri ilə bağlı Azərbaycan cəmiyyətinin narazılığını da bildirdi. Azərbaycan nümayəndə heyəti AŞPA-nın sədri Valter Şvimmerə bu təşkilatın məruzəçiləri tərəfindən hazırlanmış sənədlərdə vəziyyətin düzgün əks olunmaması ilə bağlı məktub göndərmişdir. Məktubda bu məsələnin gündəlikdən çıxarılması tələb edilir. Ilham Əliyev dedi: “Mən hesab edirəm ki, Azərbaycanda siyasi məhbuslar yox, ağır cinayətlər törətmiş adamlar vardır”.
Azərbaycan Parlamentinin AŞPA-dakı nümayəndə heyətinin üzvləri Vaqif Səmədoğlu və Asim Mollazadə görüşdə çıxış edərək, təəssüflə bildirdilər ki, Avropa Şurasının guya siyasi məhbus hesab etdiyi şəxslərin siyahısına ağır cinayət törədənlər düşmüşdür və bu siyahıları təqdim edən hüquq-müdafiə təşkilatları həmin cinayətkarların azad olunmasının nəticələrini dərk etmirlər.
Görüşdə Azərbaycanın Avropa Şurası ilə əməkdaşlığına dair bəzi məsələlər barədə də fikir mübadiləsi oldu.