Azərbaycanın dünya birliyinə inteqrasiyası qlobal etimad modelinə əsaslanır - Politoloq şərhi
Bakı, 12 yanvar, AZƏRTAC
Azərbaycanın dünya birliyinə inteqrasiyası balanslı xarici siyasət, sabitlik və qlobal etimad modeli kimi xarakterizə oluna bilər.
Bunu AZƏRTAC-a açıqlamasında politoloq, Mətbuat Şurasının İdarə Heyətinin üzvü Yeganə Hacıyeva deyib.
Onun sözlərinə görə, müasir beynəlxalq münasibətlər sistemində dövlətlərin uğuru təkcə iqtisadi potensialla deyil, eyni zamanda, çevik, praqmatik və balanslaşdırılmış xarici siyasət yürütmək bacarığı ilə ölçülür. Azərbaycan son onilliklər ərzində formalaşdırdığı modern dövlətçilik modeli və müstəqil xarici siyasət kursu ilə dünya birliyinə inteqrasiyanın uğurlu nümunələrindən biri kimi çıxış edir. Azərbaycanın beynəlxalq aləmdə tutduğu mövqe, qlobal güc mərkəzləri arasında balanslaşdırılmış siyasəti və regional sabitliyə verdiyi töhfə ölkənin siyasi-diplomatik çəkisini əhəmiyyətli dərəcədə artırıb. Azərbaycanın xarici siyasət strategiyasının əsas sütunlarından biri qlobal güc mərkəzləri ilə münasibətlərdə balansın qorunmasıdır.
Politoloq vurğulayıb ki, Azərbaycan nə hər hansı bir hərbi-siyasi bloka qoşulub, nə də beynəlxalq münasibətlərdə qarşıdurma yaradan tərəf kimi çıxış edib. Əksinə, ölkə daim müstəqil mövqeyini qoruyaraq üçüncü tərəflərə qarşı yönəlməyən, əməkdaşlığa əsaslanan siyasət yürüdüb. Bu yanaşma Azərbaycanın həm Qərb, həm Şərq, həm də Cənub istiqamətində etibarlı tərəfdaş imici qazanmasına şərait yaradıb.
Y.Hacıyevanın sözlərinə görə, məhz bu balanslı yanaşma Azərbaycanın qlobal siyasi sistemdə etimadla qəbul olunmasına, beynəlxalq təşkilatlar və aparıcı dövlətlərlə qarşılıqlı hörmətə əsaslanan münasibətlər qurmasına imkan verib. O bildirib ki, bu gün Azərbaycanın səsi beynəlxalq platformalarda dinlənilən, mövqeyi nəzərə alınan dövlət səviyyəsinə yüksəlib.
“Azərbaycanın dünya birliyinə inteqrasiyası ardıcıl və uzunmüddətli inkişaf strategiyasının nəticəsidir. Onilliklər ərzində həyata keçirilən xarici siyasət kursu ikitərəfli və çoxtərəfli əlaqələrin möhkəmləndirilməsinə, siyasi dialoqun dərinləşdirilməsinə və qarşılıqlı iqtisadi etimadın formalaşdırılmasına xidmət edib. Bu strategiya nəticəsində Azərbaycan regional və regionlararası strateji layihələrin təşəbbüskarı və əsas iştirakçısına çevrilib. Enerji, nəqliyyat və logistika sahələrində reallaşdırılan beynəlxalq layihələr Azərbaycanın geosiyasi və geoiqtisadi əhəmiyyətini artırmaqla yanaşı, onu etibarlı tərəfdaş kimi tanıdıb. Bu layihələr ölkəyə yalnız iqtisadi dividendlər deyil, həm də siyasi sabitlik və diplomatik nüfuz qazandırıb”, - deyə politoloq bildirib.
Onun fikrincə, müasir dövrdə beynəlxalq sistem geosiyasi qarşıdurmalar, enerji təhlükəsizliyi problemləri, regional münaqişələr və iqtisadi qeyri-sabitlik kimi ciddi çağırışlarla üz-üzədir. Belə bir şəraitdə Azərbaycanın sabit inkişaf xəttini qoruyub saxlaması ölkənin daxili siyasi dayanıqlığının və düzgün xarici siyasət kursunun göstəricisidir.
“Azərbaycan yalnız öz milli maraqlarını qorumaqla kifayətlənmir, eyni zamanda, Cənubi Qafqaz və qonşu regionlar üçün sabitləşdirici amil rolunu oynayır. Regional əməkdaşlığın təşviqi, dialoq və qarşılıqlı etimadın qurulması Azərbaycanın diplomatik fəaliyyətinin əsas istiqamətlərindəndir. Azərbaycanın xarici siyasətində əsas prioritetlər qarşılıqlı faydaya əsaslanan əməkdaşlıq, dövlətlərin suverenliyinə hörmət və beynəlxalq hüququn norma və prinsiplərinə sadiqlikdir. Balanslı yanaşma prinsipi üzərindən qurulan bu xarici siyasət strategiyası artıq öz uğurunu tam miqyasda sübut edib və Azərbaycanı qlobal və regional səviyyədə etibarlı, proqnozlaşdırılan və məsuliyyətli aktor kimi tanıdıb”, - deyə Y.Hacıyeva bildirib.
O, sonda qeyd edib ki, Azərbaycanın dünya birliyinə inteqrasiyası təkcə beynəlxalq arenada mövqelərinin möhkəmlənməsi deyil, həm də milli təhlükəsizliyin, iqtisadi inkişafın və siyasi sabitliyin təmin olunması baxımından mühüm əhəmiyyət daşıyır. Müstəqil, balanslı və praqmatik xarici siyasət kursu Azərbaycanın qlobal güc mərkəzləri arasında manevr imkanlarını genişləndirib, onu qarşıdurmaların deyil, əməkdaşlığın tərəfdarı olan dövlət kimi tanıdıb. Bu model Azərbaycanın gələcəkdə də beynəlxalq sistemdə etibarlı, sülhpərvər və nüfuzlu aktor kimi mövqeyini qoruyacağını deməyə əsas verir.
Bölmənin digər xəbərləri
