AZƏRBAYCANIN LOS-ANCELESDƏKİ BAŞ KONSULU HİNDİ REZERVASİYALARINDA OLMUŞDUR
AZƏRTAC-ın xüsusi müxbiri xəbər verir ki, Azərbaycanın Los-Ancelesdəki baş konsulu Elin Süleymanov Montana ştatına səfəri zamanı Flethed hindi rezervasiyasında olmuş, Saliş və Kutenay tayfalarının konfederasiya şurasının üzvləri ilə görüşmüşdür.
Tayfanın üzvləri mədəni proqram nümayiş etdirmiş, tayfa şurasının üzvü Çarli Moreqo Şimali Amerikanın yerli əhalisinin musiqi irsinin rəmzi sayılan fleytanı dostluq əlaməti olaraq təntənəli şəraitdə baş konsula hədiyyə etmişdir.
Elin Süleymanov Azərbaycan barədə məlumat vermiş, habelə türk xalqları ilə Amerikanın yerli əhalisinin ümumi köklərə malik olması nəzəriyyəsindən danışmışdır.
Hindi tayfaları qərb ştatlarının əhalisinin böyük və nüfuzlu hissəsidir. Rezervasiyaya səfər Montana Universitetinin Heydər Əliyev mükafatına layiq görülmüş tələbələrindən biri, Şimali Amerikanın yerli əhalisinin nümayəndəsi Kley Bernatın köməyi ilə həyata keçirilmişdir.
######
Bölmənin digər xəbərləri
