AZƏRBAYCANIN MƏDƏNİ SƏRVƏTLƏRİNİN DAĞIDILMASI VƏ MƏNİMSƏNİLMƏSİ İLƏ ƏLAQƏDAR AZƏRBAYCAN RESPUBLİKASI MİLLİ MƏCLİSİNİN BƏYANATI
Ermənistan Respublikasının Azərbaycana təcavüzünün faciəli nəticələri təkcə Dağlıq Qarabağ bölgəsinin və onun ətrafındakı 7 rayonun zəbt edilməsi, 1 milyona yaxın insanın qaçqına və məcburi köçkünə çevrilməsi ilə məhdudlaşmır. Azərbaycan xalqına qarşı Ermənistanda dövlət siyasəti səviyyəsinə qaldırılmış terror və soyqırımı siyasəti Azərbaycan mədəniyyətinə də ağır zərbələr vurmuşdur.
Ermənistan Respublikası “Hərbi münaqişələr zamanı mədəni sərvətlərin qorunması haqqında” Haaqa Konvensiyasının və “Mədəni sərvətlərin qeyri-qanuni dövriyyəsi haqqında” Paris Konvensiyasının müddəalarını kobudcasına pozaraq, bütün dünyanın gözü qarşısında Azərbaycanın mədəni sərvətlərini talamaqla məşğul olur.
Azərbaycan Respublikasının işğal edilmiş ərazisində ölkə və dünya əhəmiyyətli 100.000-dən artıq mədəniyyət nümunəsi dağıdılmış və qəsb edilmiş, 500-ə yaxın tarixi və 100-dən çox arxeoloji abidənin, 22 muzeyin əksəriyyəti tamamilə və ya qismən dağıdılmışdır.
Erməni millətçiləri maddi mədəniyyət abidələri ilə yanaşı, Azərbaycan xalqının folklorunu, musiqisini, ədəbiyyatını və digər mənəvi sərvətlərini ardıcıl və sistemli şəkildə mənimsəməklə, əslində, işğalçılıq müharibəsini mədəni sərvətlər müstəvisində genişləndirirlər.
Azərbaycanın xalq dastanları “Aşıq Qərib”, “Koroğlu”, “Şah İsmayıl” ermənilər tərəfindən qəsb edilmiş, “Tərəkəmə”, “Vağzalı”, “Yallı”, “Uzundərə” kimi bir çox məşhur xalq rəqs melodiyaları adları dəyişdirilməklə, bəzən də, hətta Azərbaycan dilində olan adları saxlanılmaqla, erməni musiqisi nümunələri elan edilmişdir.
Milliyyətcə erməni olan şəxslərin Ermənistanda, Rusiyada, ABŞ-da və dünyanın digər ölkələrində təşkil etdikləri “ANİ-rekords”, “Kazarian-rekords”, “Karen-rekords”, “Parseqian-rekords” və başqa səsyazma şirkətləri Azərbaycan folklor musiqisinin, eləcə də Azərbaycan bəstəkarlarının əsərlərini erməni musiqisi kimi tirajlamaqla məşğuldurlar.
Azərbaycan toponimlərini erməniləşdirən, işğal altındakı bölgələrdə, eləcə də Ermənistan ərazisində azərbaycanlıların qəbristanlarını dağıdan, Azərbaycan xalçalarını və zəbt olunmuş torpaqlarda yerləşən muzeylərdən talan etdikləri eksponatları öz milli sərvətləri kimi təqdim edən erməni qəsbkarlarının son illərdə Azərbaycan folkloruna və peşəkar musiqisinə qarşı getdikcə güclənən təcavüzü də ciddi narahatlıq doğurur. Erməni millətçiləri müasir peşəkar Azərbaycan musiqisinin banisi Üzeyir Hacıbəylinin “Arşın mal alan” operettasına və başqa əsərlərinə hələ XX əsrin əvvəllərindən başladıqları təcavüzü indi Azərbaycanın digər görkəmli bəstəkarlarının yaradıcılıqlarına yönəltdikləri plaqiat və mədəni zəbtlərlə davam etdirirlər.
Heç bir qanuna və mənəvi-əxlaqi meyarlara məhəl qoymayan erməni millətçiləri Azərbaycan mədəniyyətinə qarşı mənəvi terroru bir qədər də dərinləşdirərək, hətta dahi Azərbaycan bəstəkarı Qara Qarayevi bir sıra beynəlxalq nəşrlərdə erməni musiqiçisi kimi təqdim etməyə nail olmuşlar.
Ermənistanın Azərbaycana təcavüzünün tərkib hissəsi olan Azərbaycan mədəniyyətinə qarşı erməni millətçiliyinin qəsbkarlığı problemi ilə əlaqədar Avropa Şurasının Parlament Assambleyasında “Azərbaycan mədəni irsinin qəsbi və dağıdılması” adlı rəsmi sənəd (27 iyun, dok.N-9147) müzakirə üçün qəbul edilmişdir və problem AŞPA-nın müvafiq komitəsində araşdırılmaqdadır.
Azərbaycan Respublikasının Milli Məclisi bəyan edir ki, Azərbaycan mədəni sərvətlərinin Ermənistan Respublikası və erməni millətçiləri tərəfindən dağıdılması və mənimsənilməsi hamılıqla qəbul edilmiş beynəlxalq hüquq normalarına və prinsiplərinə ziddir.
Azərbaycan Respublikasının Milli Məclisi Azərbaycanın mədəni sərvətlərinə Ermənistan Respublikasının və erməni millətçilərinin təcavüzünün qarşısını almaq üçün beynəlxalq birliyi həmrəyliyə və yardıma çağırır.
(Bəyanat Azərbaycan Respublikası Milli Məclisinin 2002-ci il 19 aprel tarixli iclasında qəbul edilmişdir).
Bölmənin digər xəbərləri
