“Azərbaycanın milli parklarında ekoturizm fəaliyyəti” mövzusunda dəyirmi masa keçirilib
Bakı, 1 oktyabr, AZƏRTAC
Oktyabrın 1-də “Azərbaycanın milli parklarında ekoturizm fəaliyyəti” mövzusunda dəyirmi masa keçirilib.
AZƏRTAC xəbər verir ki, Ekologiya və Təbii Sərvətlər Nazirliyinin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin direktoru Hikmət Əlizadə milli parkların Azərbaycanın ən zəngin, etalon ərazilərində təşkil edildiyini və çox böyük turizm potensialına malik olduğunu deyib: “Lakin bu gün oraya gələn turistlərin sayı, onlara göstərilən xidmətin səviyyəsi bizi qane etmir. Milli parklara səfər edənlərin sayını artırmağın yollarını fikirləşmək və bu sahədəki boşluqları müəyyən etmək lazımdır. Əgər əvvəllər milli parkları il ərzində 3-4 min turist ziyarət edirdisə, bu ilin səkkiz ayı ərzində həmin ərazilərə 74 min 217 turist səfər edib. Turistlərdən 66 min 931-i yerli, 7286 nəfəri isə xaricidir. İlin sonunda bu rəqəmin 100 min olacağı gözlənilir. Ekoturizmi inkişaf etdirməklə həm Azərbaycanı daha çox tanıda, həm də ölkənin gəlirlərini artıra bilərik”.
Departament direktoru bildirib ki, ölkənin milli parklarının inkişafı üzrə Milli Proqram hazırlanacaq. Dəyirmi masada səslənən təklif və iradlar nəzərə alınacaq.
Regional Ekoloji Mərkəzin Azərbaycan nümayəndəliyinin direktoru Mələk Şükürova ekoturizmin inkişafı ilə əlaqədar Ekologiya və Təbii Sərvətlər Nazirliyi ilə əməkdaşlıq etdiklərini diqqətə çatdırıb. “Ekodəhlizlərin yaradılması” layihəsi çərçivəsində Şahdağ Milli Parkında müvafiq işlərə başlanılıb. Ekoturizm proqramının hazırlanmasına əvvəllər icmalar cəlb olunmayıb. Bu ilin may-iyul aylarında bu proqrama icmaları da dəvət edib onlara təlimlər keçdik. İcmalarla birlikdə Şahdağ Milli Parkı üçün ekoturizm proqramı hazırlanıb. Həmin proqramın tərkibində ekocığırların inkişafı komponenti də var.
O, həmçinin deyib: “Bizim layihənin əsas funksiyası infrastrukturların salınmasıdır. Belə ki, cığırlar yaradılarkən lövhələr qoyulmalı, turistlərin gecələməsi üçün yerlər yaradılmalıdır. Hazırda mütəxəssislər yerlərdə çalışırlar. Oktyabrın 20-nə kimi işlər yekunlaşacaq. Şahdağ Milli Parkında həyata keçirilən işlər uğurlu olsa, digər milli parklarda da tətbiq olunacaq. Hazırda həmin milli parkda 50-yə yaxın turistik cığır var. Şahdağ Milli Parkının Qonaqkənd və İsmayıllı ərazisində turistik cığırların salınması istiqamətində işlər davam etdirilir. Qonaqkənddən başlayaraq milli parkın ərazisindən keçərkən yaylaqlara çıxış olacaq. Burada turistlər endemik və “Qırmızı kitab”a düşən fauna nümunələrini görə biləcəklər”.
Sonra “Azərbaycanın milli parklarında ekoturizm fəaliyyətinə dair hesabat” təqdim olunub. Hesabatda bildirilib ki, Azərbaycanda xüsusi mühafizə olunan təbiət ərazilərinin ümumi sahəsi 893 min hektardır. Xüsusi mühafizə olunan təbiət əraziləri ölkə ərazisinin 10,31 faizini təşkil edir. Ölkəmizdə milli parklar yaradıldığı vaxtdan indiyədək onların turizm (rekreasiya) potensialı olan ərazilərində təbiət turizminin inkişaf etdirilməsi məqsədilə 111 ekoturizm marşrutu təşkil edilib.
Cari ilin ötən dövrü ərzində milli parklarda mövcud ekoturizm marşrutları üzərindəki məlumat lövhələrinin sayı artırılıb, milli parklarda “uşaq guşələri” yaradılıb. İlin 8 ayı ərzində milli parkları 74 mindən çox turist ziyarət edib. Turistlərin ən çox səfər etdiyi xüsusi mühafizə olunan təbiət ərazisi Göygöl Milli Parkı olub. Həmin əraziyə gələn turistlərin sayı 52 min 605 nəfər olub. Onlardan 47 min 236 nəfərini yerli, 5369 nəfərini isə xarici vətəndaş təşkil edib”.
Müxtəlif turizm şirkətləri və təşkilatlarının iştirak etdiyi tədbirdə milli parklara turistlərin cəlb edilməsi üçün təkliflər irəli sürülüb. İnfrastruktura dair təkliflər arasında nəqliyyat infrastrukturunun qurulması, yol infrastrukturunun təkmilləşdirilməsi, fiziki məhdudiyyətli insanlar üçün infrastrukturun təşkili, ekoturizm mərkəzlərinin yaradılması, at gəzintisi, yoxuşlarda pilləkənlərin düzəldilməsi, suvenir guşələri, piknik yerləri və yolboyu xəritələrin təşkili, turistlər üçün gecələmə yerləri, kampların qurulması, quşların müşahidəsi imkanlarının genişləndirilməsi, nişanların beynəlxalq standartlara uyğunlaşdırılması, su təminatı və s. yer alıb. Təşkilati-institusional məsələlərə dair isə ekoturizm üzrə işçi qrupunun, turizm şirkətləri ilə birbaşa sıx əməkdaşlığın yaradılması, infoturların təşkili və yeni ərazilərin tanıdılması, təhsil ocaqlarında maarifləndirmə tədbirlərinin keçirilməsi, özəl sektorların cəlb olunması, təhlükəsizlik tədbirlərinin yüksək səviyyədə təşkili, milli parklarla bağlı kataloq və reklamların təşkili, sosial şəbəkələrdə tanıtımın gücləndirilməsi, xarici media nümayəndələri üçün infoturların təşkili, milli parkların beynəlxalq şəbəkəyə qoşulması kimi təkliflər səsləndirilib.
Bölmənin digər xəbərləri
