AZƏRBAYCANIN REGİONDA NÜFUZU ARTIR
Dzasoxov vurğulamışdır ki, Azərbaycan nümayəndə heyəti gündəlikdəki bütün məsələlərə dair diskussiyalarda fəal iştirak edərək, öz mövqeyini dəqiq bildirir. O, forum iştirakçılarının Prezident İlham Əliyevin məktubunu böyük maraqla qarşıladıqlarını xüsusi qeyd etmişdir. Məktubda Cənubi Qafqaz dövlətlərinin regional proseslərdə rolu və yeri göstərilərək bildirilmişdir ki, bəzi problemlərin həll olunmaması regionun bütün yaradıcı potensialının açılması yolunda böyük maneədir.
Bakı forumunda QİƏT PA-nın fəaliyyətinin səmərəliliyini artırmaq məqsədi ilə Qara dənizin bütün perimetri boyu dairəvi avtomobil yolunun tikintisinə dair nadir layihə müzakirə olunmuşdur. Qurumun üzvü olan bütün ölkələrin bəyəndikləri bu çoxmilyardlıq nəhəng layihə təkcə üzv dövlətlərin iştirakı ilə deyil, həm də Qara Dəniz Bankının, habelə buna elə indidən maraq göstərən sərmayədarların vəsaiti hesabına tikiləcəkdir. Qara dənizdəki bütün limanların, o cümlədən infrastrukturun və onların bərə rabitəsi ilə birləşdirilməsinin modernləşdirilməsinə dair işlərin bütöv kompleksi də bilavasitə bu layihə ilə bağlıdır. A.Dzasoxovun fikrincə, bu, Qara dənizdə yük daşınması imkanları baxımından əsil sıçrayışdır. Hər iki layihəyə dair sazişlər ən yüksək səviyyələrdə bəyənilmiş və hazırda milli parlamentlərdə ratifikasiya olunmalıdır.
Gələn il Qara Dəniz İqtisadi Əməkdaşlıq Təşkilatının yaradılmasının 15 ili tamam olur. Onun təşkilatçılarından biri olan Türkiyə iyun ayında yubiley zirvə görüşü keçirməyi təklif etmişdir. Bu təşəbbüsü dəstəkləyən A.Dzasoxov vurğulamışdır ki, həmin görüş təşkilatın səmərəliliyinin və onun qərarlarının yerinə yetirilməsi keyfiyyətinin daha da artırılmasına xidmət edəcəkdir.
