Azərbaycanlı alimin portreti
Türkiyədə tanınmış fizik və riyaziyyatçı Baxşəli Quliyevi hörmətlə xatırlayırlar
Ankara, 17 iyun, AZƏRTAC
Həyatını elmə və yüksəkixtisaslı kadrların hazırlanmasına həsr etmiş Azərbaycan alimləri ölkəmizin hüdudlarından kənarda da hər bir Azərbaycan vətəndaşı üçün parlaq örnək olaraq qalır. Belə örnəklərdən biri də adı qardaş Türkiyənin akademik dairələrində yaxşı tanınan fizika-riyaziyyat elmləri doktoru, professor və Prezident təqaüdçüsü Baxşəli İmamqulu oğlu Quliyevdir.
Alim və pedaqoqun Tovuz rayonunun Şamlıq kəndində başlayan, daha sonra keçmiş Sovet İttifaqının və Azərbaycanın ən nüfuzlu elm mərkəzlərində keçən həyat yolu sonda onu Türkiyəyə gətirib çıxarıb və orada 18 il (1996–2014-cü illər) Van Universitetində dərs deyib.
Alim Azərbaycana qayıtdıqdan sonra təqaüdə çıxana qədər Azərbaycan Milli Elmlər Akademiyasının Fizika İnstitutunda (2015-2021) çalışıb.
Onun fundamental tədqiqatları - 100-dən çox məqaləsi mötəbər yerli və beynəlxalq jurnallarda dərc olunub və bu, Baxşəli müəllimə alimlər və mütəxəssislər arasında nüfuz və hörmət qazandırıb.
İyunun 17-də qeyd olunan 90 illik yubileyində B. Quliyevin keçmiş tələbələri və Türkiyədən olan həmkarları tanınmış Azərbaycan fiziki və riyaziyyatçısı ilə bağlı xatirələrini AZƏRTAC-la bölüşüb, onun ünvanına səmimi sözlər söyləyib və ən xoş arzularını bildiriblər.
Van Yüzüncü İl Universiteti Fizika kafedrasının professoru Harun Akkuş azərbaycanlı alimi minlərlə tələbənin qəlbini fəth edən güclü pedaqoq kimi xarakterizə edib.
“Professor Quliyevlə yollarımız 1996-cı ildə, bakalavr təhsili aldığım zaman kəsişdi. Azərbaycanlı alimlə tanışlığım gələcək akademik karyeramı formalaşdıran əlamətdar hadisə idi. O, tələbələrini daim dəstəkləyir, magistr təhsilim zamanı məsləhət verir və doktorluq dissertasiyam üzərində iş prosesində məni ruhlandırırdı”, - deyə Harun Akkuş xatırlayır.
Türkiyəli professorun sözlərinə görə, azərbaycanlı alimin fizika və riyaziyyat sahəsindəki dərin biliyi, həmçinin güclü akademik mövqeyi onun üçün bir model və bələdçi rolunu oynayıb. “Dünyasəviyyəli bir alimlə işləmək imkanı əldə etdiyim üçün çox şanslı idim. Bu gün B. Quliyevin həyatının təxminən 20 ilini həsr etdiyi kafedrada onun izi ilə gedirəm. Bu görkəmli alimin işini davam etdirməyi məqsədim hesab edirəm, istəyirəm ki, onun irsi yaşasın”, - deyə professor əlavə edib.
Türkiyənin Kocaeli Universitetinin Fizika kafedrasının müdiri, professor Elşən Vəli Azərbaycan aliminin elmi və pedaqoji fəaliyyətini yüksək qiymətləndirib. O, Quliyevi yarımkeçiricilər fizikası tədqiqatlarına mühüm töhfələr vermiş alim adlandırıb.
E. Vəli qeyd edib: “Azərbaycan Dövlət Universitetində və daha sonra Türkiyədə işlədiyim müddətdə beynəlxalq elmi dairələrdə maraq və ehtiramla qarşılanan professor Quliyevin tədqiqatlarını yaxından izləmək imkanım oldu”.
Türkiyə universitetinin kafedra müdiri Quliyevin tədris prosesindəki səylərini yüksək qiymətləndirib və azərbaycanlı alimin kadrların hazırlanmasına verdiyi töhfəni vurğulayıb.
Kocaeli Universitetinin professoru əlavə edib: “Professor B. Quliyev bir çox gənc tədqiqatçının müəllimidir. O, öz bilik və təcrübəsini daim böyük səxavətlə bölüşüb. Alimin elmi fəaliyyəti Azərbaycan ilə Türkiyə arasında akademik əməkdaşlığın inkişafına töhfə verib. Həmkarları və tələbələri dərin biliyi, çalışqanlığı, dürüstlüyü və təvazökarlığı ilə seçilən alim haqqında daim yüksək fikirlər ifadə edəcəklər”.
Bölmənin digər xəbərləri
