AZƏRBAYCANLILARIN SOYQIRIM GÜNÜ DAŞKƏNDDƏ DƏ QEYD EDİLMİŞDİR
Azərbaycanin Özbəkistandakı səfirliyində 31 mart - azərbaycanlıların soyqırımı günü ilə bağlı mərasim keçirilmişdir. Özbəkistanda və Cənubi Qazaxıstanda yaşayan Azərbaycan diasporunun nümayəndələri, Daşkənddəki Ağsaqqallar Şurasının üzvləri və Azərbaycan Mədəniyyət Mərkəzi rəhbərlərinin iştirak etdiyi mərasimdə Azərbaycan Prezidenti Heydər Əliyevin 31 mart azərbaycanlıların soyqırımı günü ilə əlaqədar Azərbaycan xalqına müraciətinin mətni oxunmuşdur. Şəhidlərin xatirəsi bir dəqiqəlik sükutla yad edilmişdir.
Daşkənd şəhər Çilanzar rayonunun axundu Amanoğlan Xaciyev şəhidlərin ruhuna dua oxumuşdur.
Azərbaycanın Özbəkistandakı səfiri Aydın Əzimbəyov ermənilərin son iki əsrdə xalqımıza qarşı törətdikləri soyqırım siyasətindən danışmışdır. O demişdir: Soyqırım bu gün də davam edir. 31 mart soyqırımının kökləri ötən əsrin əvvəllərinə gedib çıxır. 1905-ci illərdə başlanan soyqırım 1917-1918-ci və sonrakı illərdə daha qəddarlıqla həyata keçirilmişdir. Məhz bunun nəticəsidir ki, 1998-ci ildə Azərbaycan Prezidenti Heydər Əliyev “Azərbaycanlıların soyqırımı haqqında” Fərman imzaladı və o gündən sonra xalqımızın daha bir faciəsi öyrənilməyə başlandı. Bu gün sizə payladığımız tarixi məlumatlar toplusunun hazırlanmasında Azərbaycan alimlərinin soyqırımla bağlı tədqiqatlarından istifadə olunmuşdur.
Soydaşlarımız çıxış edərək ermənilərin işğalçılıq siyasətini pisləmiş, bu işdə dünya azərbaycanlılarını birliyə çağırmışlar.
Səfirlik əməkdaşlarının azərbaycanlıların soyqırımı günü ilə bağlı hazırladıqları məlumatlar toplusu Özbəkistandakı xarici səfirliklərə və beynəlxalq nümayəndəliklərə də paylanmışdır.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
