“AZERCELL TELECOM”UN ƏLİLLƏRƏ QAYĞISI
AZƏRTAC xəbər verir ki, layihələrdən biri Azərbaycan Gözdən Əlillər Cəmiyyəti nəzdində fəaliyyət göstərən “Altı nöqtə” mətbəəsinə zəruri çap avadanlığının hədiyyə edilməsidir. Mətbəədə əlillər üçün üzvlük vəsiqələri, blanklar, seçki bülletenlərinin xüsusi trafaretləri hazırlanır. “Azercell Telecom”un təqdim etdiyi texniki avadanlıq sayəsində mətbəənin fəaliyyəti daha da genişlənəcək, əhaliyə, müəssisə və təşkilatlara çap, cildləmə və digər xidmətlər göstəriləcəkdir. Mətbəə eyni zamanda gözdən əlil və zəif görən uşaqların təhsil aldığı internat məktəbi üçün dərsliklərin çapı ilə də məşğul olur.
BM-in fiziki cəhətdən əlil olan vətəndaşlarımıza kömək göstərərək reallaşdırdığı digər layihə Əmək və Əhalinin Sosial Müdafiəsi Nazirliyinin müraciətinə əsasən 400 müasir əlil arabasının alınmasıdır. Bu arabalar dayaq hərəkət funksiyaları müxtəlif səbəblərdən məhdudlaşmış əlillərin başqa şəxsin köməyi olmadan hərəkətini təmin edəcək, onların həyatına müəyyən rahatlıq gətirəcəkdir.
Qeyd edək ki, “Azercell Telecom” 10 illik fəaliyyəti dövründə sosial sərmayələr proqramı çərçivəsində 5 milyon ABŞ dollarından artıq vəsait xərcləmişdir.
