Bakı, 30 dekabr, AZƏRTAC

“AzerGold” QSC-nin Korporativ Sosial Məsuliyyət Komitəsinin Daşkəsən şəhərində vətəndaşlarla ilin yekunlarına dair görüşü keçirilib.

Görüşdə Daşkəsən Rayon İcra Hakimiyyətinin başçısı Orxan Abbasov, “AzerGold” QSC-nin İdarə Heyətinin üzvü – sədr müavini, QSC-nin KSM Komitəsinin sədri Xəyyam Fərzəliyev və “AzerGold” QSC-nin İdarə Heyətinin üzvü – sədr müavini, “Daşkəsən Dəmir Filiz” MMC-nin KSM Komitəsinin sədri İlqar Cəlilov iştirak ediblər.

AZƏRTAC xəbər verir ki, Daşkəsən şəhəri, rayonun Quşçu, Çovdar və digər kəndlərindən vətəndaşların qatıldığı görüş “Azərbaycan Hava Yolları” Qapalı Səhmdar Cəmiyyətinə məxsus sərnişin təyyarəsinin qəzaya uğraması nəticəsində həlak olanların xatirəsinin dərin hüznlə yad edilməsi ilə başlayıb.

Hesabat xarakterli tədbirdə “AzerGold” QSC və “Daşkəsən Dəmir Filiz” MMC ilə Daşkəsən Rayon İcra Hakimiyyətinin tərəfdaşlığı çərçivəsində 2024-cü ildə icra edilən, 2025-ci ildə isə icrası planlaşdırılan sosial və ekoloji layihələr barədə məlumat verilib.

Qeyd olunub ki, 2024-cü il ərzində Cəmiyyət tərəfindən “Daşkəsən rayonunda kartofçuluq təsərrüfatının inkişafına dəstək”, “Qırmızı Kitab”a düşmüş nadir və nəsli kəsilməkdə olan bitkilərin mühafizəsi və təbiətə reintroduksiyası, “Təmiz Daşkəsən”, “Kitab köşkü”, “Xəzinə” muzey ekspozisiyasının yaradılması və s. bu kimi bir sıra uğurlu layihələr həyata keçirilib. Regionda sosial rifahın gücləndirilməsi istiqamətində dövlət siyasətinə əlavə töhfə vermək məqsədilə 7 sosial aksiya təşkil edilib. Qarşıdan gələn 2025-ci ildə də sosial məsuliyyətlilik prinsipi əsasında təhsil, sağlamlıq, inklüziv inkişaf, infrastruktur layihələri, kənd təsərrüfatının inkişafı, ətraf mühit və digər istiqamətlər üzrə layihələrin icra ediləcəyi görüş iştirakçılarının diqqətinə çatdırılıb.

Daha sonra vətəndaşların müraciətləri dinlənilib, yeni təşəbbüslər müzakirə edilib. Görüşdə, həmçinin vətəndaşların qaldırdıqları məsələlər araşdırılması və mövcud qanunvericilik çərçivəsində həll edilməsi üçün qeydiyyata alınıb.

Sonda 31 Dekabr - Dünya Azərbaycanlılarının Həmrəyliyi Günü və Yeni il bayramı münasibətilə görüş iştirakçılarına bayram sovqatları təqdim edilib.